Un pista riba un supuesto produccion legal di “Hemp” a hiba investigadonan di Californa na haya plantacionnan di matanan di Marihuana. Casi por a conta 10 miyon di esakinan. E oficina di polis di e Condado di Kern cu ayudo di FBI y “Servicio de Pesca y Vida Silvestre” di California a ehecuta multiple di orden di razia riba 11 plantacion den e area di Arvin, cu ta keda na 160 Kilometer den norte di Los Angeles. Di e mas di 185 hectar di tereno, autoridadnan a destrui alrededor di 10 miyon di matanan di Marihuana, cual balor lo supera 1000 miyon Dollar riba mercado preto, segun e hefe di polis a bisa. “E plantancionnan ilegal di Marihuana a wordo cultiva bao di apariencia di produccion legal di Hemp”, asina polis a informa E codigo di Cuminda y Agricultura, mescos cu di Salud y Seguridad, ta defini cu “Hemp” industrial mester contene menos di 0.3 porciento di THC (Tetrahidrocannabinol). E testnan a revela cu e nivel di THC den e matanan aki ta demasiado halto y ta supera e limite legal, asina polis a bisa. Segun e informe aki THC ta e substancia psicoactivo den Cannabis. Investigacionnan ta sigui segun polis pero no tin informacion cuanto persona a keda deteni den e razia aki.