HOBOKEN, New Jersey – Autoridadnan federal a localisa ya un di e “cahanan preto” di e trein cu a accidenta diahuebs na New Jersey y ta investigando e causanan di e aparatoso accidente, cu a causa un morto y mas di un centenar di herido.
E prome “caha preto”, cu ta contene datonan riba e velocidad y e brake di e trein cu a accidente na e stacion di Hoboken, a wordo recupera anochi, pero ainda falta un otro cu por aporta informacion adicional.
Den un declaracion na prensa, e vice presidente di e Hunta Nacional di Siguridd di Transporte (NTSB), Bella Dinh-Zarr, a confirma diabierna cu nan a localisa e “caha preto” y cu e otro ta spera di wordo recupera den e proximo oranan.
E trein cu ta conecta e estado di New Jersey cu Manhattan a accidente den e stacion di Hoboken cu gran forsa contra e defensa di rails y hero cu tabata un ‘dead end’ ora ela drenta.
Durante e accidente Fabiola Bittar di Kroon, di 34 aña, originario di Santos (Brasil) a fayece ora cu e trein a pasa riba e railsnan cu e forsa cu e tabata tin y a balansa riba e plataforma di e stacion, na momento cu Bittar tabata wardando su trein.
Segun medionan local, Bittar, abogado y mama di un baby, ta bibando desde un aña pasa na Hoboken, caminda cu el a wordo traslada desde Brasil pa rasonnan laboral di su casa. E saldo di e victimanan actualisa ta indica cu e heridonan tabata 114, pero solamente 15 di nan a keda hospitalisa, aunke ta spera cu nan por sali den e proximo oranan. Den e trein cu a accidente tabata tin mas of menos 250 pasahero.
E makinista di trein, Thomas Gallager, a cuminsa traha pa NJ Transit, na edad di 19 aña y tin 18 aña como makinista.
E responsabel di NTSB a bisa cu Gallager, kende a resulta herida, a mustra di ta dispuesto pa haci prueba pa si nan haya resto di alcohol of droga y ademas pa revisa su movimentonan 72 ora prome cu a accidente.
Tambe “cualkier cos cu e ta corda te na e momento di e impacto,” Dinh-Zarr a bisa.
Ta pendiente tambe un fecha pa realisa e interogatorio di e makinista.
E trein a accidente pa 8’or y 45 ora local den un ora piek pa un sistema di trein entre New Jersey y Manhattan cu mas of menos 100 mil persona ta uza diariamente.
Segun informenan extraoficial, riba espera di datonan cu NTSB ta proporciona, e trein a drenta dene stacion di Hoboken, cu tripel di e velocidad permiti, riba 16 kilometer pa ora.
E accidente ta generando problemanan den transporte di pasahero entre New Jersey y New York. E sector di e stacion caminda cu e trein a accidente a keda cera, mientras cu investigacionnan ta keda realisa y ta retira e trein.
Fuente: NTN24