Actualmente tin un autor internacional di vakantie na Aruba hunto cu su famia. Ta trata di Kindra White. Y aunke e nomber aki ta djis e alias cu Sharlène Blanco-Eduarda ta uza y e tin basta aña residencia den exterior, su raiz ta firme pariba di brug. E kier a probecha su bishita pa riba su isla natal p’asina e hendenan di su isla mes tambe cera conoci cu ne.
Durante ultimo cuater aña, Kindra a skirbi nada menos cu diescinco buki, cautivando lectornan cu su manera original di conta storia y presenta personahe interesante. E genero cu ta specialisa su mes aden ta esun di Fantasia, Paranormal, Historia di Hada y Romance, cu un toke scur of gotico y su bukinan ta destina exclusivamente pa un publico adulto.
Entre su trabou ta destaca e titulonan: ‘Goldencrest Pack Holiday Stories Collection’ y ‘The Awakened Beauty’, cual ambos a cosecha gran acogida na pais di varios continente, incluyendo Asia. Su proyeccion ta creciendo asina hopi, cu pa 2025 Kindra ya ta invita pa forma parti di convencion internacional na Illinois y posteriormente, un di dos na Texas.
Ta interesante tambe pa sa cu Kindra su faceta como autor a cuminsa, en realidad, como un terapia pa yud’e maneha su depresion. Cu tempo esaki a converti den un carera exitoso cu fanatico rond mundo cu ta anticipa cada produccion nobo pasobra nan ta ripara e dedicacion cu e ta pone den su arte y su habilidad pa crea mundonan scur, pero magico.
Den su bida priva, e ta balansa su bida como casa y mama di tres yiu cu su carera como autor na Enschede, Hulanda. Ora cu e no ta tra’i computer creando storia nobo, e ta disfruta di lesa buki di tur genero, ademas di traha cheesecake.
Te cu aworaki, e autor ta mantene e distribuimento di su bukinan online, incluyendo riba e plataforma di Amazon. Tambe tin un edicion special exclusivo cu el a traha pa e prestigioso cadena di libreria Mericano, Barnes & Noble. Su proximo lansamento lo ta na november awo cu e titulo ‘Jimena, Book 1 of Women of La Fuentes Cartel’, un storia cu ta basa riba un lider narcotraficante femenino.
Sharlène ta gradici di antemano na un y tur cu ta apoy’e den su trayectorio y ta spera cu su storia por inspira otro escritor potencial na Aruba pa tuma e stap y realisa nan meta. Pa conoce mas di Kindra White y su bibliografia, por bishita https://linktr.ee/KindraWhite.
