Dia 5 di mei proximo e legendario poeta Quito Nicolaas a keda invita pa ta den e programa di e Comite 4 y 5 di mei di Amsterdam Zuidoost pa declama su poema ‘Een verloren zoon’ y pa conmemora nos heroenan di Segunda Guera Mundial. E poema historico aki ta dedica na Boy Ecury y na tur esunnan cu a perde nan bida durante resistencia. Cu su presentacion riba e dia aki, e autor multifacetico lo duna atencion na un pagina den historia di Reino Hulandes cu no por ser lubida. Alabes pa pasa e antorcha di paz y libertad pa e generacion di e milenio aki.
E poesia aki el a yega di skirbi den añanan ’90 riba e fecha di 4 di mei. Na television ta tin e conmemoracion di tur esnan cu a keda fusila y esaki a cautiva su persona di tal manera cu el a inspira Quito pa skirbi e poesia. E tempo ey ya caba el a yega di tende y lesa e buki ‘Boy, een Antilliaanse jongen in het verzet’ di Ted Schouten y tabata conoci cu e bida di e studiante Boy den tempo di guera. No a tarda mucho cu el a haya e prome imagennan cu e por a traduci den palabranan poetico. Den cada strofa e verso ta refleha un fase di bida: mucha – hoben – studiante – adulto – fayecido. E poesia conoce un elemento surrealistico tambe den e di dos strofa.
Langs kelderluiken/
marcheerden hoge laarzen/
tussen gestreepte pyama’s/
die sneden door de waterplas/
van geplenste regendruppels/
E poesia aki cu a haya e titulo ‘Een verloren zoon’ a keda warda pa años den un map den cual e poeta ta colecciona su poëmananan, pero nunca a lubida su existencia. Na 2001 cu e tabata trahando na compila e manuscrito di su di tres buki ‘Gerede Twijfels’, e poema aki a keda selecta. For di e momento cu e tomo di poesia a keda publica na Hulanda, e poema a haya un propio bida y a cuminsa biba bou di nos hendenan y e Hulandesnan. No solamente e ta refleha un parti di e historia mundial, pero e ta duna reconocemento na un di nos heroenan den siglo pasa.
Tabata na aña 2011cu den e centro cultural De Balie na Amsterdam cu a organisa un anochi pa recorda e heroe Arubiano Segundo Jorge Aldelberto Ecury.Un parti di e programa tabata cu a pasa e pelicula ‘Boy Ecury’ (2002) di regisor Frans Weisz. Den presencia di ex- Minister Plenipotenciario E. Abath y su esposa, medionan di prensa y demas invitadonan, Quito Nicolaas a declama e poema ‘Een verloren zoon’. Y tabata man’e e publico a bay bek den tempo, rebibando cu e letranan poetico un pasado cruel. Den cara di esunnan presente bo por a lesa e pregunta y lamento riba nan cara.
Riba un dia man’e 5 di Mei nos tin di para keto y refleha riba e mundo cu nos ta bibando aden. Recorda tambe e papel cu e militia Arubiano a desplega den tempo di guera. Sin lubida e guera na otro partinan di mundo y e menasa den nos region, cual ta sucesonan cu mester pone nos pensa riba paz y libertad. Principionan y logronan cu mester keda inculca den nos alumnonan na scol y hobennan pa garantisa un estado democratico y libertad di expresion. Evitando e consecuencia di un situacion indeseabel manera esaki a keda accentua den e ultimo verso di e poema cu no tabata na Auschwitzs pero mas cerca di cas.