Directora di Dienst Technische Inspectie (DTI), sra. Richella Dorothal, a duna un splicacion amplio tocante e trabounan di e departamento, e controlnan di vehiculo, siguridad den trafico y e situacion actual cu e listanan di espera pa keuring.
Control di vehiculo y responsabilidad ciudadano
DTI ta encarga cu e keuring di vehiculonan cu ta wordo presenta na nan hal, caminda ta determina si un vehiculo ta specialmente “no keur”. Sra. Dorothal a enfatisa cu esaki ta conta tanto pa vehiculonan particular como pa esnan cu ta wordo encarga pa asina yama *verhuur*.
Si un vehiculo no ta cumpli cu e exigencianan di keuring structural, e vehiculo ey no ta supone di ta riba caminda. E directora a manda un aviso special na e ciudadanonan, indicando cu hopi hoben ta haci uzo di e vehiculonan aki, y cu mayornan tambe mester tene cuenta cu e parti di siguridad. Den caso di un accidente, e cosnan por resulta hopi malo y e consecuencianan por ta grave. Pa e razon aki, siguridad den trafico mester keda un responsabilidad di cada ciudadano pa asina procura pa e siguridad di nan mesun yiunan.
Comision di Siguridad den Trafico
DTI ta formando parti activamente di e comision di siguridad den trafico (*Verkeersveiligheid*) cu a wordo lanta recientemente. Den e comision aki, DTI ta duna nan input, conseho, aviso y informacion a base di con e departamento ta maneha e exigencianan di keuring y con ta categorisa esakinan. E meta principal ta pa aporta na un miho siguridad den trafico, locual sra. Dorothal ta considera sumamente importante. E ta curasha tur hende pa keda revisa nan vehiculo pa asina sigura cu esaki ta cuadra cu e normanan pa e por ta riba caminda.
Aumento den keuring y orario structural diasabra
Pa loke ta trata e controlnan den cooperacion cu Cuerpo Policial di Aruba (KPA), sra. Dorothal a confirma cu esaki a conduci na un aumento drastico den e cantidad di peticionnan pa keuring. Como consecuencia di esaki, actualmente tin un tempo di espera mas largo pa por haya un cita pa keuring. Esaki ta debi cu hopi persona cu no a keur nan auto pa hopi tempo, aworaki tur pareu ta purba haci un cita, locual a crea un saturacion den e temporada aki.
Pa alivia e situacion aki y duna un miho servicio, DTI a cuminsa habri structuralmente riba algun diasabra pa asina atende cu e keuring di autonan. Ademas, e servicio aki riba diasabra ta specialmente dirigi na companianan grandi cu tin un flota grandi di vehiculo.
Enfoke riba trucknan grandi
Sra. Dorothal a expresa preocupacion tambe riba e ultimo accidentenan cu a involucra trucknan grandi y opleggers. Den e casonan aki, keuring ta hunga un rol crucial, specialmente ora e peso ta demasiado halto, ora e oplegger no a wordo controla, of ora no a test e breknan debidamente. Tur esakinan por tin consecuencianan serio riba caminda, banda di e comportamento di e propio chauffeur di e truck.
E directora Dorothal a recorda e companianan cu nan tin e deber di percura pa nan trahadonan ta safe, sigurando cu e vehiculonan ta wordo keur y ta pasa e keuring debidamente, aportando asina na e siguridad di nan propio personal y di e comunidad en general.