Auto a pega candela den careda cu chauffeur

Un chauffeur a scapa milagrosamente den oranan di marduga ora cu su auto a pega candela. Esaki a sosode despues di 3’or.

Un patruya tabata pasando den Caya Ernesto Petronia, ora cu di leu el a mira candela y mesora a bati alarma na Cuerpo di Bombero.

E hecho a tuma luga net banda di Universidad di Aruba,prome cu yega Dominicus College. E chauffeur tabata bayendo direccion nort ora cu prome huma a cuminsa sali y mesora el a hala un banda drenta e cura. Na momento ey ya el a cuminsa mira vlam y a baha rapidamente for di e auto Nissan, color cora.

Bomberonan a yega hopi lihe y mesora a bay den accion mirando cu tin waya di coriente hopi cerca di e candela. Den menos di mey ora a paga e candela y a laga e luga safe.

Esaki ta di dos auto cu ta pega candela den un luna di tempo. Hopi biaha ta papia di un corto circuito. Bomberonan ta bay haci nan investigacion, y esaki ta importante si ta trata di un auto relativamente nobo y mira si por ta trata di un eror di fabricacion.

Comments

comments