Riba e caminda di Hooiberg pa Sero Biento diabierna anochi un chauffeur di nissan cube biniendo for di pabou a constata cu e caminda di pariba ta bashi y a bay lora na su man robes, pero momento di lora a sinti un golpi y ora a baha a constata cu ta un brommer el a dal. Polis di trafico a yega di biaha na e sitio y topa cu e situacion y a solicita mas patruya pa duna un man.
Segun testigo y e chauffeur di e auto, e brommer bahando for di pariba tabata sin luz, y esaki a pone cu e homber coriendo e cube a tuma nota cu caminda ta bashi y a bay lora pa bay direccion nort den Hooiberg.
E brommer a bay para basta meter leu di e sucedido te algun meter pabou di ex wellwell bar. E motococlista tabatin fractura serio na su pia robes, te hasta weso por a tuma nota tabata sali, ambulance a presenta cu urgencia. Paramediconan a brinda asistencia di biaha y cu atencion, e victima a keda stabilisa na e sitio y transporta pa hospital.