Diasabra marduga polisnan a detene un persona na Olde Molen pa ta burachi y ta haci hopi fastioso na e lugar. Dogcatcher a presenta pa busca e detenido y hibe warda di Shaba.
Pero na e lus nan di trafico banda di Superfood e dogcatcher tawata para na lus wardando e lus bira berde pe bay pero patras nan ta sinti e detenido ta bon skop e auto pero den esei nan a sinti un sla hopi mas fuerte. Ora e oficialnan a baha bay wak ta un auto Toyota Yaris blanco a bin tur cu tin sin brake ta dal duro tras di un Chevrolet Spark cora pa e Spark bay dal den e dogcatcher.
E polisnan mesora a bay check si tur cos ta bon cu e detenido. E chauffeur di e Yaris tawata burachi y a wordo deteni tambe e momento ey. Varios patruya di polis a presenta y a transporta e dos detenido nan pa warda di Shaba. E dos polis nan den e dogcatcher y tambe e chauffeur di e Spark a sinti dolor na curpa y ambulans a presenta pa atende cunan. Daño material ta considerabel. Mirando cu tin un auto di polis envolvi specialista di trafico a presenta pa tuma dato. Roadservice di seguro tambe a presenta pa tuma dato.