Diahuebs prome cu 10’or di anochi riba Green Corridor Pos Chikito entre e brug pa rotonde Pos Chikito a keda registra un accidente fuerte unda un nissan cube A-45907, a bolter, personanan cu a mira e accidente pasa a baha di biaha bati alarma na Polis. Central a mobilisa varios unidad policial, hasta ambulance.
Na yegada di e prome unidad policial a topa cu e cube den banda basta kibra. Un homber aden ta keda di dolor na curpa, a solicita pa brandweer presenta pa duna un man pa saca e victima for di e cube.
Mientras cu paramedico ta atendiendo cu e homber, el a cuminsa resisti y hasta insulta e paramediconan. E homber a sigui cu su insultonan y diripiente tur hende a capta con e homber a lanta estilo hulks bula sali for di e auto y tabata cla pa brinda cu tur hende. E homber tabata mustra di ta bou influencia segun el a comenta cu su tata a fayece y pese’y e ta den tristesa. A cancela brandweer debi cu no tabata necesario mas. Paramedico a bay cu e homber den e ambulance pa un control medico.