Un eror di un chauffeur a causa cu un otro a perde control riba su auto y a bolter. El a practicamente sali ileso.
E accidente a sosode rond di 1’or di merdia riba e caminda di Pavia pa Meiveld. Segun por a compronde na e sitio, e Nissan Almera tabata bahando for di Piedra Plat. Net den e bocht na Pavia, un Mitsubshi a medio subi su dilanti. Esaki a causa cu e chauffeur di Nissan Almera a perde control riba su vehiculo.
Na momento cu e autonan a mishi cu otro, e Almera a bay na banda robez, dal den un mata, cu el a kibra den dos pa despues bay halto y cay riba su dak. E auto a keda cu su cuatro wielnan den laira.
E chauffeur mes a sali for di e vehiculo. Aunke inicialmente el a bisa cu e no mester di ambulance, paramediconan a atende cu ne. Despues a dicidi di hib’e hospital pasobra e tabata sinti dolor den su pecho.