Augustus 26-28, 2016: Aruba ta yama bon bini na e di 22 edicion di ‘International Pro-Am Golf Tournament

Di 26 pa 28 di Augustus lo tin e di 22 edicion di ‘Aruba Internacional Pro-Am Golf Tournament’. Esaki lo tuma luga riba e prestigioso cancha di golf di Tierra del Sol Country Club & Spa. Aruba Tourism Authority conhuntamente cu otro patrocinadonan ta organisando e evento cu e expertonan di Tierra del Sol.
E torneo di golf aki ta un torneo masha popular mes internacionalmente specialmente den e paisnan di Latino America.

Promocion pa Aruba
Aruba Tourism Authority ta haci uzo di e evento di golf aki pa promove Aruba den Latino America y Merca. Cu cooperacion di A.T.A. su oficinanan na varios país, ta organisa diferente torneonan cualificatorio caminda e ganadornan di cada pais ta ricibi e oportunidad di bin hunga e final na Aruba. Tur A.T.A. su oficina di PR den tur mercado
ta contribui grandemente y ta haci tur esfuerzo pa promove Aruba den mundo di golf.
Pa e torneo aki cada ekipo di golf ta consisti di 5 golfista, 1 profesional y 4 amateur.

Entrega di un handicart specializa
E aña aki, oficina di A.T.A. situa na Hulanda a tuma initiativa hunto cu BMVG (Batouwe Minder Valide Golf) y Power Tech Base, pa entrega un asina yama ‘Golf Cart’ (Handicart) special pa esnan cu tin problema físico cu e deseo di hunga golf. E ‘Handicart’ lo wordo entrega door di Aruba Tourism Authority na Tierra Del Sol su ekipo di golf diabierna awo durante e recepcion di apertura. Aki lo bay ta presente e conocido presentador di deporte Jack van Gelder como tambe Elsemieke Havenga kende tabata un campeon Olimico den hockey y awo ta un empresario hopi conoci na Hulanda.

Tierra del Sol
Ta un inmenso placer pa Tierra del Sol un biaha mas ta host e evento aki y ta yuda den e organisacion, conhuntamente cu A.T.A. pa e evento di Aruba International Pro-Am Golf Tournament ta un exito. Durante transcurso di añanan e torneo a demostra su derecho di existencia y ta sigui crece. Den e calendario anual di torneonan di golf cu ta tuma luga na Tierra del Sol, e torneo aki ta den top y anticipacion ta grandi den Caribe.

Ekiponan participando
E aña aki e torneo ta cera cu 24 ekipo en total di e paisnan: Bahamas, Brasil, Colombia, Corsou, Hulanda, USA, Puerto Rico, Venezuela y naturalmente Aruba.
Manera custumber e hungadornan aparte di hunga golf tin un programa social hopi atractivo cu ta inclui brunch, dinner y fiesta di clausura cu entrega di trofeo na e ganadonan di e torneo 2016.
Aparte di e aporte di Aruba Tourism Authority y Tierra Del Sol, e torneo ta conta tambe cu otro companianan manera: Caribbean Mercantile Bank, Aruba Airport Authority, Aruba Aloe, Diamond International, etc.
Pa mas informacion por tuma contacto cu: Amayra Boekhoudt na Aruba Tourism Authority tel. 582-3777 Ext. 254.

Comments

comments