E audio mes den circulacion cu a haya e piscadonan na Colombia ta falso. Ningun autoridad di Colombia tin e informacion aki. Ta trata di tres piscado di descendencia Asiatico, kendenan ta perdi for di fin di siman.
MasNoticia tabatin contacto cu Warda Costa di Armada Nacional, Capitania di Puerto Bolivar, La Guajira (Colombia), y Teniente di Fregata Capitania di Puerto di Rio Hacha. Ningun di e autoridadnan aki ta na altura di piscadonan di Aruba cu lo a yega te na e costa Colombiano, despues di a confronta problema riba lama.
E tres piscadonan local di descendencia Asiatico a subi e boto, matricula A-2266, diasabra anochi y despues di esey no a tende nada mas di nan. E informe ta un poco confuso, ya cu familiarnan mes no tin suficiente informacion. Un rato ta bisa nan a bay pisca Marriott bay abou y otro ta bisa cu nan a bay zuid di Aruba.
Segun expertonan, si ta pabou di Marriott y nan a confronta problema, e ora nan lo por drif bay direccion di Panama. Pero si ta pazuid di Aruba, e ora nan por yega costanan Colombiano.
Kustwacht for di momento cu famia a bata alarma diadomingo anochi, a lanta nan avion pa cuminsa un buskeda y a manda informacion tambe pa barconan den bisindario di e areanan di buskeda. Pero te na e momentonan aki no a topa cu nada y no a haya ningun informacion.
Mas perdi
Aruba tin mas piscado cu a subi lama y no a bolbe. Ta hopi nan ta. Pero esnan mas ultimo ta e dosnan cu a perde den luna di october aña pasa abordo di e boto di 17 pia Rubia.
Pa dianan largo Kustwacht di Aruba a busca den e area nortwest di Aruba pero sin resultado. Te dia di awe no a haya ningun informacion ni resto di e boto.