Na honor di e celebracion di e 40 aniversario di Timeshare na Aruba, Aruba Timeshare Association (ATSA) a laga traha un rapport, cu data cu a wordo colecta den 2017, pa asina duna un bista di e industria di timeshare riba nos isla. E rapport a wordo traha den colaboracion cu Aruba Tourism Authority, ATA, y a wordo prepara pa Universidad di Aruba, UA. Lo siguiente ta e di dos di e cinco articulonan, resumiendo e estudio.
Como e voz reconoci di vacation ownership na Aruba, ATSA kier a alcansa cinco obhetivo principal cu e encuesta:
1. Identifica e motivacionnan y factornan di mercadeo pa cu compra di timeshare na Aruba.
2. Determina e uzo di timeshare y e gasto economico di e propietarionan di timeshare.
3. Determina e posibel impacto economico directo y indirecto di e industria di timeshare pa 2017 na Aruba.
4. Explora e percepcionnan di e propietarionan di timeshare tocante e calidad y satisfacion cu e industria di timeshare na Aruba.
5. Explora e parti demografico di e propietarionan pa determina si ta existi diferencianan significativo den e percepcion di producto di timeshare di Aruba.
E encuesta pa e colectamento di data actual a wordo traha uzando un encuesta cu a wordo realisa na 2008 pa Dr. Ryan Peterson. E instrumento di e encuesta a wordo adapta di e encuesta original.
METODOLOGIA
Durante lunanan di juli y augustus 2017, ATA a prepara e encuesta cual a wordo manda pa residentenan di Estados Unidos cu ta registra como propietario di timeshare na Aruba. Aproximadamente 3410 encuesta a wordo completa y a wordo uza como parti di e analisis di e data. Si e encuesta no a wordo completa 100%, e elementonan cu no a wordo contesta no a wordo uza pa evalua e resultado di e rapport.
E encuesta online a wordo uza pa garantisa cu tabatin un grupo grandi y representantivo di e propietarionan di timeshare enbes di solamente colecta data en persona di e propietarionan cu na e momento ey tabata riba nos isla.
E studiantenan di Universidad di Aruba a haci un encuesta similar cu e propietarionan di timesahre cu tabata na Aruba durante september y oktober 2017. E encuestanan a wordo haci en persona na Aruba y nan tabatin un base mas amplio di e origen di e propietarionan di timeshare. E cantidad di respuesta tabata 358 di 399 cu a wordo pidi pa participa cu un response rate di 89.72%.
E ENCUESTA
E cuestionario di e encuesta tabatin cuatro seccion: adkisicion y compra di timeshare, uzo di timeshare y loke nan ta gasta mientras riba nos isla, calidad y satisfaccion di timeshare y demografia.
E prome seccion tocante adkisicion y compra di timeshare a puntra e propietarionan con y ki ora nan a cumpra nan timeshare na Aruba. Tambe a wordo puntra cuanto nan a paga pa nan timeshare y kiko ta nan motibonan pa cumpra un timeshare.
E encuesta tambe a puntra tocante e importancia di e factornan di sales & marketing den nan decision final pa cumpra un timeshare na Aruba.
E di dos seccion di e encuesta a wordo diseña pa capta e uzo di timeshare y loke ta wordo gasta mientras nan ta na Aruba. E encuesta a haci esaki door di puntra ki tipo di plan di uzo nan tin, cuanto persona tin den nan grupo y e cantidad di placa cu e grupo a gasta durante nan estadia na Aruba, incluyendo e tarifa di mantenimento y otro tarifanan. E encuesta tambe a puntra specificamente tocante e cantidad di placa gasta na cosnan manera cuminda y bebida, compras y otro actividadnan cu a duna balor economico na nos isla.
E di tres seccion a evalua e calidad y satisfaccion di timeshare y a analisa e calidad di timeshare den su totalidad y aspectonan di e destinacion, e atmosfera di Aruba, y e caracteristicanan distinto di Aruba den percepcion di e propietarionan di timeshare. Tambe a wordo puntra tocante e satisfaccion y nan intencionnan, manera intencion di bolbe cumpra y e intencionnan positivo di ‘word of mouth’ relaciona cu Aruba y timeshare na Aruba.
E ultimo seccion di e encuesta a evalua e datonan demografico basico, incluyendo e cantidad di biaha cu e propietario di timeshare a bishita Aruba, e pais di origen actual, nan sexo y nan edad, un average di e entrada familiar. En general, e encuesta tabata un compilacion extenso di preguntanan na e propietarionan di timeshare pa yuda identifica ken nan ta, kiko nan ta disfruta di nan experiencianan di timeshare na Aruba, y con esey ta refleha den loke nan ta gasta na Aruba y nan intencionnan relaciona cu timeshare na Aruba.
Fuente: arubatsa.com
E data di e encuestadonan a wordo colecta via ATA su online tool pa encuesta, e data a wordo hasi limpi y nan a indentifica e respuestanan cu no tabata completo of cu irregularidad, y nan a wordo elimina di e analisis. Tabatin un total di 3410 encuesta cu por a wordo uza y nan a wordo colecta di propietarionan di timeshare, y a wordo haci pa Aruba Tourism Authority (ATA)