Riba 19 di Juli, durante un encuentro cu stakeholders di ATSA hunto cu prome minister Wever-Croes, e asociacion a entrega un carta cu ta subraya su preocupacionnan di mas principal den e siguiente cuater añanan di gobernacion nos dilanti.
Riba e carta, Bubali Plas ta wordo subraya como un prioridad halto.
“E planta [Sewage Water Treatment Plant] na Bubali ta den cay den otro,” e ta bisa, “e ta completamente anticua. E awa no ta wordo trata apropiadamente, e awa ta bay te den lama cu bacteria cual ta un menasa pa salud y medio ambiente, como tambe e ta crea un holo hopi fuerte cu un abundancia di sangura den henter e area di Eagle Beach, specialmente ora awa yobe.
Aruba mester miho leynan ambiental pa establece un miho manera pa deshace di desperdicio y awa di pos di companianan local. Aruba tambe mester busca miho maneranan pa sigura cumplimento. Esaki mester wordo adresa de inmediato, cu un alternativa pa tratamento di pos fuera di zona turistico. Y si e ta den e mesun localidad pa esaki tin un setup mas desaroya cu ta mantene tur rekisito y tuma tur precaucion contra holo y insectonan, respetando preocupacionnan ambiental y di salud publico.”
Hecho: ‘Aruba su sistema di drenahe ta sobrecarga, y ATSA ta hopi preocupa, awor haciendo su preocupacionnan publico pa prome biaha. A pesar cu e problema ta uno di mas cu 50 aña, esaki a escala den e ultimo añanan.
Den Juni 2019, ATSA a haya sa di un rapport basa riba calculacionnan existente, e sistema [aeration system] cu loke nos ta deposita den Bubali Plas, no por logra e nivelnan di oxigeno rekeri pa haci esaki ‘limpi’.
E eficiencia actual ta mas abao cu 50% y tin un impacto negativo riba e wetlands na Bubali Plas. Bubali Plas ta core e overflow pa lama, y esaki por causa daño na bida marino cu bo no lo por recupera di dje. E nivel halto di desperdicio humano den e awa cu nos ta deposita den lama, ta afecta nos coralnan den un forma hopi negativo, resultando den beach erosion.
Sigur, esaki lo por afecta turismo, pero si nos KIER turistanan, nos MESTER bini cu un plan di tratamento pa awa di desperdicio! Esaki ta un alarma GRANDI pa ATSA, na bienestar di tur hende, como tambe di bida marino, reefs y pisca.’
E palabranan aki, comparti cu Premier Wever-Croes, a wordo tuma for di un rapport: Preliminary Business Case for RWZI Bubali Aeration System, RWZI=Riool Water Zuiverings Instalatie, un documento tecnico di 34 pagina por medio di TNO, un entidad apolitico y independiente. El a subraya e problemanan potencial asocia cu riesgo halto di calamidad na nos medio ambiente.
E rapport tambe a subraya solucionnan cientifico, tur concerni cu Bubali Plas.