E miembronan di Aruba Timeshare Association a disfruta di nan lunch meeting mensual na La Cabana Beach Resort & Casino cu representantenan di mayoria propiedadnan vacacional di e isla, como tambe varios socio. E presidente di ATSA, Ursell Arends, a comparti e prioridadnan clave di e asociacion pa 2018, manera cu e la presenta na prome minister di Aruba, Evelyn Wever-Croes, den un reunion recientemente. E la reafirma cu e obhetivo di ATSA ta pa contribui positivamente na e economia di Aruba y hasi esfuersonan pa di manera efectivo influencia henter e comunidad.
Como e bos di e industria di Vacation Ownership na Aruba, ATSA a compila un lista di asuntonan clave cu ta enfatisa e retonan principal y duna solucionnan alternativo pa yuda resolve nan.
Entre e prioridadnan clave cu a wordo discuti cu e miembronan di e gabinete, e implementacion di e Beach Policy; e revision di e status di tur compromisonan existente y aproba pa cada categoria di acomodacion, y e necesidad critico di crea un master plan; e dificultad pa haya permiso di trabao pa personal cualifica; e impacto negativo di e aumento di criminalidad; e necesidad pa introduci un impuesto ambiental pa tursimo di barco crucero; e introduccion di incentivo pa hotelnan pa nan keda upgrade; e implementacion di un promesa pa un alivio financiero na e hotelnan den forma di un reduccion di impuesto pa materialnan pa renobacion; e cobransa di electricidad consumi na lugar di e capacidad instala; y e papel di ATA como un organisacion di mercadeo sin desvia di su obhetivo principal.
Entre e promenan riba lista di prioridadnan clave den e mundo empresarial riba nos isla ta e reformacion di AOV, reformacion di seguro medico y e reformacion fiscal. ATSA a propone un serie di manera pa reduci e costonan pa hasi negoshi, reduci ausencia di empleado y promove un tarifa di impuesto special, un bonus basa riba funcionamento y aumento di productividad. E miembronan di ATSA despues a expresa nan deseo di mira e retonan y solucionnan di e inventario di GOA, den un forum habri, porta den un formacion di dialogo social, cu por converti den un debate di mesa rondo fructifero.
E miembronan di e asociacion tambe a acorda pa investiga e cambionan propone den nan Statutanan un poco mas. Manera ya caba a wordo publica, e cambionan propone den e Statutanan lo permiti ATSA crece, invitando proyectonan di condominio. E directiva actual y e miembronan ainda ta revisando tur e opcionnan encuanto inclui condominio den e miembresia di ATSA.
Den e reunion a wordo constata cu aunke ATSA y AHATA ta sirbi dos diferente segmento di e mercado, ainda nan tin hopi area di interes mutuo, manera e beach policy, impuesto y asuntonan laboral, y nan mester mehora e nivel di colaboracion mutuo.
Na final di e reunion, e tesorero Freddy Albertus a duna un vision financiero, y presidente Arends a informa cu e apoyo di CEDE Aruba y MGM Source, ATA lo realisa un encuesta entre e miembronan di timeshare den nan database, tocante proyectonan di obra di caridad cu nan ta interesa pa apoya.
Durante e sesion di palabra liber, Joe Najjar a informa tocante e actividadnan di e Tourism Product Enhancement Fund: un pedido di 40 bari di sushi mas grandi ta na caminda pa pone na localidadnan popular y e restauracion di 27 palo di luz electrico cu ta bai te California Lighthouse. Najjar tambe a expresa cu TPEF a contribui generosamente na e creacion di un website pa Birdlife Conservation Foundation. Ademas TPEF a solicita diseño di cinco compania di arkitectura local pa un version modesto di e Green Corridor na Malmok, y a duna nan apoyo na algun fundacion local manera Stimami-Sterilizami y Atelier 87. Najjar tabata orguyoso di anuncia cu e Museo Arkeologico a ricibi un donacion necesario pa cumpra airconan nobo y pa e reparacion di su plafon.
Invitado especial Sr. Martis di Aruba Crib Rental a duna un presentacion tocante e buscamento di material pa baby y mucha chikito, pa bishitantenan cu ta keda den Vacation Rentals.
Presidente Arends a gradici e ekipo culinario di La Cabana pa organisa un evento perfecto cu a inclui un lunch dushi y saludabel.