Informe Policial: Diabierna pa mas o menos 3:30 di awe diabierna atardi central di polis ta haya un jamada cu ta bisa cu un atraco a cabi tuma lugar na Hulp BestuursKantoor Savaneta. Ta asina cu na jegada di Patrouille por a compronde cu total 3 hende homber cara no tapa y tur tres cu arma di candela a caba di atraca dos meneer cu a bin busca e placa di dia e momento ey ( geld transport ).
Un di nan a los un tiro na unda cu danki Dios no a alcansa nuin di dos di e personanan aki, despues un un rato un yamada ta drenta na central di polis for di colleganan di opleiding school bisando cu nan ta tras di e atracadornan aki y na altura di hotel Roy’s, nan ta wak e tres sospechosonan ta subi den dos diferente auto y nan a sali den direccion pabou.
Ta asina cu tur unidadnan di polis a cuminsa cu e buskeda di e atracadornan aki . Na altura di Franse Pas ta para un Nissan March y na unda ta bay over na detene dos sospechoso. Tambe e mesun momento un otro unidad di polis ta bin topa cu un Nissan Sentra patras di un cas na pos chikito.
Ey nan ta manda Polis technico pa asina hasi su investigasion y tambe ta tuma e auto aki den beslag. Un rato despues na Sabana Basora un unidad di polis ta para un Toyota Tercel y eynan ta detene e chauffeur y tambe tuma e auto den beslag. Total a detene 5 hende . Dennan dos Arubiano y total 3 auto den beslag,. E total di placa cu a bay cu ne ta mas o menos 30.000 florin. Atraco team tin e caso.
Tambe slachtofferhulp a presenta na e sitio di e sucedido pa atende cu e personanan cu a wak loke a pasa y e dos victimanan di e atraco. Cuerpo policial kier a gradici tur e colleganan pa e bon trabou cu den un corto tempo a sa di jega y detene e sospechosonan.
Nos di Cuerpo Policial ta pidi ken cu por a wak algo jama tip lijn di polis 11141.