Actualmente ta na Mar del Plata, Argentina coach di ciclismo den persona di sr. Aldrick Maduro, kende ta sigui un curso Coaching Course nivel 3 como tambe dos atleta prospecto di Aruba, esta Benay Statia y Gabriel Thielman tambe lo forma parti di e campo di entrenamento aki.
Den e prome siman e curso ta consisti di e parti teoria pa e coachnan, mientras e siguiente dos simannan lo tin un campo di entrenamento na unda tur e atletanan cu nan aplicacion a wordo acepta lo uni pa e campo aki den cual ta identifica talentonan femenino y masculino den e deporte di ciclismo. Na banda di esaki lo duna un miho guia cu ta posibel na e atletanan y yuda e coachnan traha den un forma mas profesional cu e talentonan hoben. E campo di entrenamento ta organisa pa e federacion mundial di ciclismo UCI hunto cu e federacion di ciclismo di Argentina.
Federacion di Ciclismo Arubano, AWB, a ricibi e invitacion di parti di UCI y a probecha di e oportunidad unico aki. Coach Aldrick Maduro ta un ex-ciclista y tin su mesun centro di entrenamento na Aruba, esta Al Training Performance y awor lo engrandece su conocemento un tiki mas den e ramo di ciclismo. Mester bisa cu e campo di entrenamento lo ta for di 27 di November te cu 10 di December.
Un danki sigur na Lotto, e Loteria di Aruba pa medio di Comision di Subsidio a haci posibel cu nos atletanan y coach porsigui e curso na Mar de Plata, Argentina.
Cumprando weganan di Lotto manera Catochi, Big 4, Zodiac, Wega di Number Korsou, Lotto di Dia, Lotto 5, Mini Mega y Raspa y Gana, bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio.