Recientemente e atletanan hubenil di tenis di mesa ChingHo Chung y Mikayla Mathilda a participa den e torneo pre-clasificacion Olimpico na Republica Dominicana. Cu nan tremendo prestacion durante di e Caribbean Cadet and Junior Table Tennis Championship teni na Georgetown, Guyana, e dos atletanan di tennis di mesa ChingHo Chung y Mikayla Mathilda a haya e derecho di hunga un torneo di pre-clasificacion pa e Weganan Olimpico Hubenil 2018 na Republica Dominicana. E weganan di pre-clasificacion aki a conta pa e paisnan di Latino America como tambe pa e islanan den Caribe. Un total di 3 hungado pa categoria so lo presente na e Weganan Olimpico Hubenil 2018, e proximo aña na Buenos Aires, Argentina. No obstante cu ambos atleta di Aruba no a logra nan clasificacion pa dicho weganan, e experiencia tabata uno sigur inolvidabel. Nan a bataya contra di e mihonan den nos region di Caribe y e continente Americano. E diferente comentarionan ricibi for di esnan di exterior tabata uno bon. Aruba sigur tin bon nivel di tenis di mesa y cu Ching Ho y Mikayla nos tin futuro den e deporte aki.
Mester bisa cu tanto ChingHo Chung y Mikayla Mathilda a conoce un bon desaroyo den nan trayectoria den e deporte di tennis di mesa. Tur dia e hobennan aki ta entrena riba e parti tecnico, tactico y mental mientras localmente tur siman tin wega entre e hungadonan. Luna pasa nan a competi den un torneo internacional di Caribe teni na Guyana, ambos atleta a logra cay den premiacion. E hoben ChingHo Chung a logra yega te e gran final den U15 den 33 hungador y keda na di dos lugar mientras Mikayla Mathilda a logra un di tres luga den dobel den U18 hunto cu su partner di Cuba. Remarcabel ta cu Mikayla tin solamente 13 aña di edad. E torneo di pre-clasificacion pa e Weganan Olimpico Hubenil sigur ta un oportunidad unico pa tanto Mikayla como ChingHo pa asina nan por midi nan propio nivel contra di e miho hungadornan den nan edad di e continente Latino America y e region di Caribe. Hunto cu e dos atletanan lo biaha coach Ruddy Raga.
Un danki sigur na Lotto, e Loteria di Aruba pa medio di Comision di Subsidio cu a yuda subsidia e participacion di e atletanan ChingHo Chung y Mikayla Mathilda pa e weganan pre-clasificacion Olimpiada Hubenil na Republica Dominicana.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio.