E dos atletanan prospecto di gimnasia artistico Amika Every y Kim de Vries a biaha pa e ciudad di Panama City unda den e weekend binidero nan lo competi den e asina yama VIII Central-America Junior Gymnastics Championship. E atleta Amika Every lo competi den e categoria 12 aña y lo debuta den e categoria Junior (13-15 years), mientras Kim de Vries lo competi den e categoria 16 aña. Na e competencia aki varios pais lo ta presente cu nan prospectonan manera El Salvador, Guatemala, Nicaragua, Honduras, Panama y Mexico. E competencianan lo ta den e Megapolis Convention Centre unda diasabra awor Amika y Kim lo mira accion.
Despues cu algun aña atras e deporte di gimnasia a haya e oportunidad di competi na nivel regional por a mira claramente cu Aruba tin un bon nivel di desaroyo den e deporte Olimpico. Asina a cuminsa concentra pa bira mas competitivo mientras nos e diferente seleccionnan di gimnasia artistico a cuminsa atende camponan di entrenamento como tambe campeonatonan di nivel den nos region y continente. Den e aña 2018, e seleccion di gimnasia artistico a atende un campo di entrenamento na Republica Dominicana cu a conta cu entrenadonan na nivel Olimpico y aki nos gimnastanan a acapara e atencion. Durante e vacacion escolar na juli/augustus nos seleccion di gimnasia pa un temporada largo a atende un otro campo di entrenamento na Medellin, Colombia y a competi tambe na e Campeonato Suramericano Gimnasia artistico nivel USAG na Cali, Colombia.
Awor dos di e atletanan formando parti di e seleccion nacional esta Every y De Vries lo competi na e junior championship na Panama. Hunto cu e dos atletanan a biaha coach Jimmy Palma como tambe Milly Bagheri cu ta presidente di e federacion di gimnasia Arubano.
Lotto, e loteria di Aruba pa medio di Stichting Sportsubsidie Aruba a yuda subsidia e biahe di e delegacion di gimnasia artistico pa e VIII Central-America Junior Gymnastics Championship.
Lotto, e loteria di Aruba tin diferente wega; Catochi, Big 4, 1-OFF, Zodiac, Wega di Number Korsou di Lotto, Lotto di Dia, Lotto 5, Mini Mega cu su Mega Plus y e weganan di Raspa y Gana. Cumprando Lotto bo ta contribui na deporte riba nos isla. E meta ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Stichting Sportsubsidie Aruba.