E dianan 15 pa 31 di October proximo lo tuma luga e “Gran Canaria Fronton King Pro 2016” na Islas Canarias, Spaña. E dos top bodyboarders nan di Aruba Jeremy Loefstok y Randolf Kock tambe lo forma parti di e evento aki como e number 1 y 2 ranked pa e federacion di bodyboard di Aruba. E competencia “Gran Canaria Fronton King Pro 2016” ta partI di e World Tour di Bodyboard organisa pa e federacion mundial di bodyboard APB. Mester bisa cu ambos atleta ya tin experiencia internacional mirando cu ya pa varios aña nan ta competi den e tour mundial di APB y ta representa Aruba dignamente den tur competencia bishita.
Aña pasa Aruba a competi cu un delegacion mas grandi den e dos competencianan Sintra Pro 2015 y Nazare Pro 2015 teni na Portugal. Recientemente e hoben Joshua Kelly tambe a competi den un competencia profesional teni na e propio Portugal. Den e ultimo añanan, e deporte extremo aki a bira uno hopi popular particularmente bou di nos hobennan kendenan ta practica esaki na nos costanan Norte. E federacion di bodyboard esta Aruba Bodyboard Association ta haci su maximo esfuerzo pa engrandece e deporte door di organisa su competencianan a base regular y ta purba a lo menos competi un bes pa aña den exterior pa asina nos atletanan gana mas experiencia internacional.
Un danki sigur na Lotto, e Loteria di Aruba pa medio di Comision di Subsidio cu a subsidia e biahe di e atletanan Jeremy Loefstok y Randolf Kock pa e competencia mundial di bodyboard “Gran Canaria Fronton King Pro 2016”.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.