Atletanan masculino Brian Howell, Raibiently Mercalina y e atletanan Femenino Kayla Arends, Mali Rafina, duonan hubenil di beach volleyball, ta cla pa representa Aruba
durante e Weganan Olimpico Hubenil 2018 na Buenos Aires, Argentina.
Despues di a conquista e Campeonil di CAZOVA Youth Olympics Games” na juli ultimo, e Atletanan masculino bao guia di nan Entrenador/Coach Sr. Elmerlindo Robles de Medina y e atletanan femenino bao guia di nan Entrenador/Coach Sr. Irald Phelipa a sigi cu e fase di preparacion na un Campo di Entrenamento na Tampa (USA).
Durante e lunanan tras di lomba a encera cambionan grandi den nan bida diario, unda sigur diciplina, dedicacion, forza mental, alimentacion y madurez tawata e areanan di atencion. E Atletanan a duna di conoce cu nan a crece inmensamente durante e ultimo lunanan di preparacion y cu hopi pasion y dedicacion nan ta cla pa subi cancha di beach volleyball na Buenos Aires pa competi contra e Paisnan grandi di mundo manera e.o. Australia, Brazil, Alemania, Puerto Rico, Monaco, Hulanda, Suecia, Estados Unidos y Canada.
E disciplina di Beach Volleyball ta e deporte cu tin mas dianan di competencia den e schedule 2018 di Youth Olympics Games na Buenos Aires. Weganan lo cuminsa dia 7 di Oktober y lo finalisa dia 17 di Oktober 2018.
Na e “Youth Olympics Games” den Beach volleyball lo competi 32 Pais di mundo y Aruba ta un di e Paisnan aki cu lo representa Aruba/ CAZOVA durante e weganan aki. Pa Aruba y pa Aruba Volleyball Association esaki ta pa prome biaha den historia cu Aruba a clasifica pa Weganan Olimpico Hubenil y lo ta un honor pa mira e Bandera di Aruba y su Atletanan di Beach Volleyball desfila durante e Apertura di “Youth Olympics Games” cu lo tuma lugar dia 6 di oktober 2018.
Un palabra di gradicimento na bay na tur persona y instancia cu a apoya y contribui na e preparacion di e atletanan aki pero muy especial na nan Entrenadornan Sr. Phelipa y Sr. Robles de Medina, Comite Olimpico Arubano y Stichting Sportssubsidie Aruba pa haci un soño bira realidad. E delegacion di Aruba lo biaha dia 2 di oktober proximo pa Buenos Aires, Argentina.
Aruba Volleyball Association hunto cu tur e Organisacionnan afilia na AVA, e miembrecia, demas altletanan y henter e famia di Volleyball ta desea Mali, Kayla, Raibiently y Brian hopi exito na Buenos Aires !