Sr. Giovanni Arends, di Aruba Bodybuilding Association ta splica cu mas o menos 12 atleta a sali pa Colombia, pa asina nan participa den e competencia di Mr. Olympia, den e parti amateur. Una bes bo gana esaki, segun sr. Arends, bo ta gana bo carnet di profesional, cu lo por hibabo un step mas leu como profesional.
Esaki por wordo considera un competencia mundial, ya cu no ta bin atletanan di Sur America of Caribe so, pero di tur parti mundo. Y mester bisa cu Aruba ta hopi mas miho prepara e aña aki.
Segun Sr. Arends, e sport aki no por wordo considera manera futbol, cu ta tin wega tur siman. E sport aki ta tuma aña pa bo prepara mes. Ta tuma 6 luna pa “bulk”. Despues di esey ta bin e “cutting season”. Sr. Arends a splica cu e ta un proceso di casi 12 luna pa full e proceso, pa forma bo curpa.
Mayoria di e atletanan cu a participa e aña aki, segun e beleid di Aruba Bodybuilding Association, ta atletanan cu a participa den Mr. Aruba. Si e asociacion no tene su mes na e beleid aki, e ora lo haya cu tur hende kier bay afo, y no competi den Mr. Aruba, y esey lo causa daño na e organisacion di Mr. Aruba. Aworaki tin dos atleta cu ta bayendo afo, pero segun Sr. Arends, ya caba e dos atletanan aki a firma cu nan lo bay participa den Mr. Aruba e aña aki.
Minister Arthur Dowers tabata na Airport pa duna sosten moral na e atletanan cu a sali pa Colombia, deseando nan exito den nan competencia. Tambe ta un sosten nan e deporte, y e grupo aki ta haciendo un parti importante pa sigura cu mas hende jong ta drenta den e deporte. Banda di ta bezig cu bo mes, bo ta bezig cu bo salud. E deporte ta algo bon pa loke ta e movecion, pa loke ta e parti mental, y sigur na e momento cu nan como profesional ta sali pa nan pais, gobierno mester sostene nan.
Minister Arthur Dowers a desea e atletanan hopi suerte y ta spera cu nan bin cu medayanan. Y si nan no bin cu medaya, tambe lo keda apoyanan, pasobra nan a bay representa nos pais, nos bandera y tur hende por mira cu nos tambe por.