Den e fin di siman tras di lomba, e hoben delegacion di triathlon a competi na Trinidad and Tobago den e campeonato di Carifta unda a topa e mihor tri-atletanan di Caribe den nan edad. Mester bisa cu nos muchanan a logra haci un tremendo papel den e campeonato aki unda e nivel tabata haltisimo.
Mayoria di nos muchanan a participa pa prome biaha na campeonato aki. Den e standing final di paisnan participante, Aruba ta sali na di 7 luga di e 11 paisnan.
Diasabra a competi na e disciplina di triathlon, mientras pa su mañan diadomingo tabata tin riba programa aquathlon sinembargo e organisadornan no por a completa e competencia di aquathlon esaki debi na lama bruto y eynan a opta pa core e distancia na pia y laga e parti di landamento afo.
E dos hobennan Vera-Elise Bakmeyer y Christiaan Jansen a logra subi podium na Trinidad and Tobago. E hobencita Vera-Elise Bakmeyer a logra sali na un di 5 luga den e campeonato di coremento e diadomingo, mientras cu e diasabra e hoben Christiaan Jansen a logra un di cinco luga mescos Vera-Elise pero e biaha aki den e triathlon 11 – 12 aña. Mester bisa cu tur nos otro representantenan Aleeza Semeleer, Rylan Semeleer, Justin Morales y Rebecca Jansen a logra un tremendo papel den e campeonato di Carifta Triathlon & Aquathlon Championship.
No tin duda cu esaki ta simplemente e prome stap den e direccion corecto, participacion internacional ta un necesidad pa midi e nivel di nos atletanan. Awo nos muchanan, coach y mayornan sa cu e competencia eyfo (den Caribe) no ta facil y si kier tin logro nos mester traha mas duro ainda. Un palabra di pabien na henter e delegacion di Aruba Triathlon Association.
Lotto, e loteria di Aruba tin diferente wega; Catochi, Big 4, 1-OFF, Zodiac, Wega di Number Korsou di Lotto, Lotto di Dia, Lotto 5, Mini Mega cu su Mega Plus y e weganan di Raspa y Gana. Cumprando Lotto bo ta contribui na deporte riba nos isla. E meta ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.