Diabierna anochi a tuma luga e di 14 aña di evento di Premio Excelencia den Deporte, unda cu a entrega premio na e atletanan cu mas a destaca den aña 2016. E anochi aki tabata inolvidabel pa tur esunnan cu tabata presente. Un biaha mas Ministerio di Deporte a duna su sosten na e evento aki cu a tuma luga den e ballroom di Aruba Marriot Hotel and Stellaris Casino.
Minister di Salud Publico, Deporte y Cuido di Nos Grandinan, dr. Alex Schwengle tabata presente e anochi aki desde comienso te na final. E Minister a remarca cu e evento tabata bunita y necesario. “Mi ta kere cu ta definitivamente ta un anochi cu mester sigui cune tur aña pa duna elogio y balor na nos deporte na Aruba. Sigur no solamente na nos hubentud cu ta bin, pero tambe sigur na e baluartenan. Con cu bay bin e ta forma un circulo”. For di e baluartenan nos ta siña y nan por traspasa e amor pa deporte na e generacion nobo. Asina e hobennan cu ta bin na deporte ta tene nos grandinan contento tambe, e Minister ta kere cu asina mester ta.
E aña aki un biaha mas tabata un tarea dificil pe comision por a saca e ganadonan di cada categoria. A nomina 71 miho atleta di 22 federacion. E resultado di e anochi aki ta Deportista infantil femenino te cu 13 aña: Rebecca Jansen (Triatlon); Deportista infantil masculino te cu 13 aña: Ching Ho Chung (Tenis di Mesa); Deportista hubenil femenino 14 te cu 18 aña: Chiara Petrocchi (Taekwondo); Deportista hubenil masculino 14 te cu 18 aña: Patrick Groters (Landamento); Atleta di Aña Local 2016: Renze Postma di Triatlon, Aruba Triathlon Association; Atleta di Aña Internacional 2016: Aksel Samardzic (Beach Tennis).
Pa e categoria di Nobato di Aña femenino y masculino e aña aki no tabatin suficiente nominado y esey a pone cu a scoge pa reparti e premionan entre e atletanan cu a wordo nomina. Tambe e anochi aki a reconoce nos baluartenan, scolnan, MVP di e scolnan, atleta femenino y masculino di Special Olympics Aruba, atletanan di Olimpiada y Paralympic.
Scolnan ganado tabata Prinses Amalia pa scol basico y Colegio Arubano Oranjestad pa scol avansa. Como MVP scol basico tabata Julymar Croes di Cacique Macuarima school y Jan Pollak di Scol Basico Washington, MVP scol avansa tabata Lizanne Kelly di Colegio Arubano Oranjestad y Diquion Ras di Maria College Mavo.
Esunnan di Special Olympics cu a haya reconocimento tabata Andre Geerman y Jolanda Perez. Atletanan di Olimpiada y Paralympic tambe a haya un reconocemento e anochi aki. Nos baluartenan cu a haya nan reconocimento mereci ta Richard Simon, Jossy Tromp, Chu Halabi, Freddis Refunjol, Roly Bisslik, Nadeis Reyes, Ramon Buckley, Lola Vrolijk, Harry Croes y Fenchi Croes.
Den deporte falta hopi cos y nos ta haciendo hopi trabou, Minister Schwengle a remarca. “Mi trabou no ta e trabou di detaye. Mi trabou no ta e trabou di verf un edificio, mi trabou no ta esun di farandula. Mi trabou ta e trabou basico”.
Ministerio di Deporte ta hibando un campaña fuerte, temanan manera bon gobernacion, Good governance den deporte y salubridad y el a tarda un tiki pa nos tur yega na un consenso cu berdad e ta necesario y bo ta nota cu e organisacionnan ta aceptando. COA ta accept’e, ASU ta acept’e, Lotto, etc. Pero esey ta significa cu e tin consecuencia. Esey ta nifica cu lo reorganisa varios organisacion, unda cu bo mester bin cu un maneho moderno y unda e moderno ta duna mas espacio pa transparencia, accountability, ta carga responsabilidad, duna responsabilidad. Eseynan ta temanan cu eyfo no ta bende bon, pero ta necesario.
Aki na Aruba tin hopi cu ta haci deporte y toch nos tur tin e gevoel, pero e efecto no ta loke cu nos kier y e tin di haber cu esey. “Mester mas placa? Mi ta kere cu probablemente mester mas placa,” Minister Schwengle a remarca. Si bo tin mal maneho y ni cuanto placa wordo tira aden, bo no ta bay haya mucho mas producto. Mas producto ta mas mucha den sport, mas resultado pe deporte. “Mi ta kere cu e organisacionnan di deporte no ta mucho diferente cu mi di e pensamento aki. Aworaki nos ta yegando na consenso riba diferente punto. Nos tin e documento cla cu loke nos ta yama Sport Visie Document. E vision no ta e deporte cu nos kier hiba pe maneho cu nos kier yega pe venidero 10 añanan den linea grandi. Y nos partnernan den deporte ta para tras di dje.”
E reto awo ta pa e partnernan firma. “Talk is cheap, pone bo firma no pone bo boca. Pone bo firma riba e papel y para tras di un vision di nos, di pais no di AVP, pero pais pa pais. Ban carg’e unanimamente, ami ta zorg di bringa si. Pa bin cu mas placa, cu lo ta via Lotto”. E ley cu mester bin ta hopi importante. E ley pa regula “kans spelen”, pasobra e ta garantisa Lotto bida largo. Y por crea e dies miyon of mas cu mester.
“Mi ta gradici e comision cu a organisa e anochi aki. E ta bunita, e ta hopi bon dunando balor na nos atletanan. Mi ta spera cu nan spera di haci bon trabou. Y mi ta gradici tur cu a participa, cu a yuda. Un biaha mas pabien grandi na tur su nos atletanan, nos baluartenan, y tambe sigur na e famianan y nos boluntarionan. Nos boluntarionan ta sumamente importante,” Minister Alex Schwengle a termina bisando.