Aruba Paralympic Committee tin un atleta nobo den Gregory Chong kende ta un atleta di Powerlifting. Awe diasabra e atleta Chong hunto cu su entrenador lo biaha pa Mexico City, Mexico unda nan lo atende un campo di entrenamento sigui pa un competencia dia 5 di december. Nunca antes un atleta cu limitacion fisico a representa Aruba den un competencia internacional di powerlifting. E atleta Chong cu tin varios luna ta entrena den forma intensivo bou gui di coach Parish Richardson lo competi den e categoria di +80kg. Aki nos por mira cu despues di Betto Maduro, Yurwin Gomes, Sheneley Tromp y Jesus David de Marchena awor ta toca turno na Gregory Chong pa representa Aruba na Mexico den un evento internacional di deporte cu lo conta cu presencia di mas di 400 atleta rond mundo. Notable ta cu atleta paralympico Gregory Chong lo ta enbusca di su clasificacion pa e Weganan Para-Panamericano Lima 2019 .
Un danki sigur na Lotto, e Loteria di Aruba pa medio di St. Sportsubsidie Aruba cu a subsidia e biahe di e atleta paralympico Gregory Chong pa e campodi entrenamento y competencia teni na Mexico City, Mexico.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e St. Sportsubsidie Aruba.