Diahuebs anochi a inicia e curso “Declarant Douane” organisa pa Departamento di Aduan Aruba cu colaboracion di ATIA. Directora di ATIA, Sra. Michelle de Groot a habri e anochi extendiendo un bon bini na e cursistanan. De Groot a expresa di ta hopi contento di por mira e curso inicia despues di hopi luna di organisacion. E interes pa inscribe tabata sumamente grandi y den tempo hopi corto a yena e 25 luganan cu ta tin disponible. Ademas ya caba tin un lista di espera di 25 persona mas cu lo haci e curso durante e segundo tanda cu lo inicia na Augustus.
Minister Angel Bermudez como invitado especial tambe a dirgi algun palabra na e 25 cursistanan di e prome tanda. Den su discurso Minister Bermudez a enfatisa e importancia di e curso cu lo facilita e proceduranan di declaracion di mercancia na Douane y lo resulta den miho servicio na e clientenan di e brokers participante. Minister a finalisa dunando e cursistanan un palabra di pabien pa a tuma e iniciativa di participa den e prome tanda di e curso.
Señor Lito Pablo como director suplente y cabesante di e curso a sera e parti oficial di e anochi splicando cu e obhetivo ta pa na final di e curso e cursistanan por interpreta e leynan di mesun manera cu e duaneronan y asina kita tur duda cu por tin pa acelera e proceduranan y evita multanan cu ta wordo duna na momento cu no ta adhere na e leynan of ta interpreta e leynan di manera diferente. Ademas lo train e cursistanan riba e systema di Asycuda cu a wordo introduci algun aña pasa pero pa cual nunca a ofrece un training official.
E curso lo sigui te final di Juni y lo finalisa cu un examen official pa cual e cursistanan cu pasa e examen exitosamente lo haya nan certificado. E fecha pa e segundo tanda di e curso lo wordo anuncia despues. Pa mas informacion por tuma contacto cu ATIA via [email protected].