ATIA a ricibi bishita di Minister Plenipotenciario di Aruba na Hulanda, señor Juan David Yrausquin. Entre otro Minister Yrausquin a splica kico e tareanan di Arubahuis ta na Hulanda y con Arubahuis por asisti comercio di Aruba. Durante e reunion a bin dilanti cu ATIA ta lamenta cu nunca e funcion di Aruba como hub entre Hulanda y Latino America a lanta for di tera. E funcion aki sigur ta uno cu Aruba lo por saca hopi probecho di dje pero Aruba mester por tin un rol caminda e ta ofrece un balor agrega como hub. Den cuadro di esaki, ATIA y Minister Yrausquin a acorda di trece un sesion di informacion practico tocante e tratado LGO cu ta ofrece e oportunidad di exporta productonan pa Hulanda sin mester paga impuesto di importacion. Den e sesion aki lo trese dilanti cua productonan ta bin den remarke, kico ta e procedura, etc.
Un di e puntonan cu Minister Yrausquin kier enfoca riba dje ta e studiantenan Arubiano na Hulanda y con pa trecenan mas cerca di comercio di Aruba pa asina ofrecenan un estimulo pa bin bek Aruba despues di nan estudio. Ta importante pa ATIA ricibi e informacion riba por ehempel cuanto studiante lo ta cabando nan estudio den ki temporada y den cua estudio specifico pa asina por informa e miembronan. Riba esaki tambe ATIA y Minister Yrausquin a acorda di traha hunto pa asina logra conecta e studiantenan cu e companianan local.