Despues cu ATIA a organisa un anochi di informacion hunto cu Refineria di Aruba, awo nan tin un miho bista kico ta e reapertura di CITGO, segun directora di ATIA, Michelle de Groot.
ATIA ta wak e reapertura di e refineria como algo positivo, door cu e lo tin su impacto positivo riba nos economia. Con grandi e impacto lo ta, no ta sigur, pero si na un manera positivo. A scoge e topico aki no solamente door cu e ta relevante, pero door cu tabata sinti cu despues cu e acuerdonan a wordo firma na October, a bira hopi keto y kier a haya mas claridad den con lihe e refineria lo habri su portanan bek. Manera cu por a scucha durante e evento, den e presentacionnan di tanto Alvin Koolman como Alirio Zambrano, e lo por tuma un 18 pa 24 luna pa por yega na un refineria cu lo ta full operacional y durante periodo aki, nan lo ta trahando riba e turn around di e refineria.
ATIA tabata basta skerpi na varios ocasion. E por duna e asociacion un bista mas cla kico ta e meta di e refineria, mirando cu ta papia aki di no un refineria di custumber, sino di gas y otro cosnan cu nan kier haci. De Groot a agrega cu pa ATIA tabata hopi importante pa tin claridad riba e periodo pasobra e nocion cu a wordo duna na comienso ta cu un acuerdo ta wordo firma y mañan e refineria ta habri y tur cos ta operacional, cual tin di compronde cu no ta e caso. Pero esaki ta bon pa sa, pa por prepara.
De Groot a sigui splica cu Alvin Koolman a enfoca riba e parti di e funcion specifico cu e modelo di refineria aki lo tin, cual ta un asina yama Upgrader. Esey ta nifica cu lo transforma e crudo mas pisa cu tin den un producto intermedio cu ta mas facil pa bende na refinerianan cu ta traha riba e producto final. Manera tin di compronde, tin un demanda mas grandi pa tipo di refinerianan aki cu ta haci cu e tipo aki tin chens pa keda un tempo mas largo compara cu e refinerianan cu nos tabata tin den pasado. A duna esaki como ATIA un trankilidad, pasobra esey tabata un di e preocupacionnan cu tabata biba cerca nan.
Awor cu tin un bista kico ta Citgo, ATIA tin un miho relacion entre nan y Citgo segun Michelle de Groot.
E ta kere cu despues di e evento, a establece un prome contacto cu Citgo y tambe cu Refineria di Aruba, cual no tabata tin prome cu e evento. Awor aki por tin un contacto mas estrecho y wak den ki manera ATIA por asisti den e tipo di actividadnan aki y con por pusha pa esaki pasa tambe pa e refineria ta un catalisator pa actividadnan economico rond di dje.
Segun de Groot, e lo trece su oportunidadnan si cu por ta berdad prome no tabata tin. E ta algo cu ta nobo pa Aruba y semper algo nobo ta trece oportunidadnan nobo. Na final ATIA ta wak esaki como algo hopi positivo.