Recientemente ariba iniciativa di ATIA a cuminsa un prome dialogo pa asina inventarisa e puntonan pa mehora contacto entre tur partnernan cu ta den e cadena di importacion, cual ta un proceso esencial pa comercio y economia di Aruba.
Den e reunion tawata presente ATIA, ASTEC, APA, y representantenan di liñanan di barco. E reunion a bay den un bon ambiente na unda comunicacion y intercambio di informacion ta un di e puntonan crucial cu a wordo atendi.
E punto di salida ta cu e proceso di importa producto mester tuma luga na un manera mas eficiente posibel pa asina comercio por ricibi nan productonan na tempo, y alabes ASTEC, APA, y e transportadonan pa medio di e eficiencia aki, controla gastonan envolvi mas hopi posibel.
Tin algun punto cu a wordo papia ariba dje, cu no ta cay bou control di e esunnan presente pero si ta causa tardansa den e proceso y ta haci e proceso mas caro y no productivo.
ATIA lo sigui cu reunionnan cu otro organisacionnan y gobierno pa trata na elimina mas hopi posibel e factornan cu ta impedi mas eficiencia y productividad
ATIA ta gradici tur presente y e conclusion ta cu esaki ta prome di varios reunion cu lo tin pa asina pa medio di dialogo purba mehora un proceso di vital importancia pa comercio y Aruba.