Aruba ta den un situacion financiero hopi precario. E crisis di COVID-19 a causa cu hopi compania ta den problema financiero serio, specialmente cu nan cashflow. ATIA a identifica un preocupacion fiscal pa su miembronan.
Manera ta conoci, si un compania su jaarrekening (cuenta anual) no ta finalisa, e compania mester declara y paga un winstbelasting provisional igual na e winstbelasting paga na aña anterior, cu den e caso aki lo ta 2019.
E situacion real ta cu hopi empresario y companianan chikito y mediano no ta alcansa pa completa nan jaarrekening (cuenta anual) pues e companianan aki lo mester entrega y paga un winstbelasting provisional basa riba cifranan di 2019.
Hopi di e companianan menciona, lo tawata tin ganashi na 2019 compara cu 2020 unda cu un gran parti di ATIA su miembronan a indica cu nan a sufri perdida door di e situacion financiero debi na e crisis di COVID-19. Si companianan mester paga impuesto provisional basa riba ganashi di 2019, e companianan posiblemente lo por haya nan mes cu problema di cashflow.
Pa continua, si un compania a paga demasiado impuesto na 2020 (e winstbelasting provisional tawata mas halto cu e compania ta debe actualmente), e proceso pa ricibi su placa bek di Departamento di Impuesto por tuma algun aña enbes di 6 luna manera ta stipula den ley.
Pa e rasonnan ariba menciona, ATIA a manda un carta informando Minister di Finanzas, Asuntonan Economia y Cultura, Sra. mr. Xiomara J. Maduro (MinFEC), di ATIA su preocupacion y na mesun momento a presenta un posibel solucion pa considera.
E posible solucion por ta igual cu punto number 3 di Plan Alivio Fiscal I na unda aña pasa a duna un extension general di 6 luna, pa por entrega e declaracion final y haci pago di winstbelasting pa compania (te cu 30 di november 2021).
E solucion cu ATIA ta propone ta uno simpel pa implementa y maneha pa asina alivia e peso di cashflow pa e companianan chikito y mediano y evita cu nan ta haya nan mes den problemanan mas severo.
ATIA ta wardando un contesta di MinFEC y ta spera di por haya un contesta positivo pronto pa duna claridad na comercio di Aruba.