Durante Asamblea General, Aruba Trade and Industry Association, ATIA, a eligi su board pa aña 2019-2020. Manera ta indica den e statutonan di e asociacion, durante e prome reunion di board despues di e Asamblea General, miembronan di board a wordo nombra den e diferente funcionan di board. Como Presidente nobo pa e asociacion a keda nombra, Sr. J.M. (Jeannot) de Cuba. E presidente nobo lo tin asistencia di e Vice-Presidente, Sr. Ronnie van Trigt, Tesorero, Sra. Mireille de Miranda y Secretario, Sr. Enrique (Tito) de Cuba.
E board ta consisti di 11 miembro en total, representando varios sector di nos economia. Ademas di e presidente, vice-presidente, tesorero y secretario, e board ta inclui Sr. Roland Croes, Sr. Donald de Veer, Sra. Tisa LaSorte, Sr. Tristan Every, Sr. Frank Snijders, Sr, Matthijs Bijen y Sra. Juliska Harms.
Sr. Jeannot de Cuba tin un carera largo como abogado, ela presidi Raad van Toezicht di APFA, ela fungi como Deken di Orde di Abogado y forma parti di varios comisión legislativo. Pa ultimo dos ana Jeannot de Cuba a forma parti di board di ATIA y awor como presidente e y su coleganan di board lo sigui traha hunto cu directiva y staff di ATIA pa defende y promove e interesnan di principalmente ATIA su miembronan y di comercio en general.
ATIA ta gradici Sr. Ronnie van Trigt cu a cubri e rol di presidente di board ATIA pa varios aña y a haci esaki cu hopi dedicacion y determinacion.