Ronald van Trigt como presidente di ATIA, ta splica riba e dialogo cu tin entre e asociacion y minister di Husticia.
Como ATIA recientemente a tene un dialogo cu minister Dowers y e puntonan aki a wordo menciona y atendi y di parti di minister tambe, a bin dilanti cu comercio riba su mes tin cu tambe contribui mescos cu henter nos pueblo pa loke ta siguridad, no solamente di nos pais, pero di nos personanan individual.
A haci un yamada e tempo ey como comerciantenan responsabel, wak e aspecto di ilegalidad, cu ta un di e problemanan, pero tambe responsabilidad di cada un comerciante. Manera bisa door di banker’s Association y otro instancianan, tin cu wak y actua na un manera responsabel. No ta bisa cu mester bringa crimen na tur nivel pero tampoco no por pensa cu nos ta biba na 1940 mas. Un comerciante mester tin su responsabilidad. Tin banconan pa deposita placa. Tin sistemanan pa transporta placa. mester haci uzo di e sistemanan aki, pasobra si bo haci un cos tur dia rutinario y bo ta hiba cu placa cas, esaki ta cosnan cu malhechornan ta wak y nan ta haci uzo di e oportunidadnan ey. Por mira recientemente cu malhechornan ta studia comerciantenan cu ta hiba placa cas y nan ta wordo atraca. Eseynan ta cosnan cu nan mes mester tuma responsabilidad y lastimamente tin malhechor cu ta dedica nan mes na esaki. Pero ta un responsabilidad di cada un di nos pa actua na un manera responsabel pa purba preveni pa ta victima di crimen.
Tin desaroyonan cu ta pasa den un pais cu no ta facil pa para. Pero e tema di criminalidad mester haya su atencion lo mas pronto posibel, segun van Trigt.
Tin biaha tin tendencianan ta sosode den un pais cu ta duro pa frena, un di nan sigur sigur cu ta pensa cu mester fren’e mas hopi posibel ta criminalidad. Tabata tin un combersacion hopi habri tin cu bisa cu minister di husticia y no ta e prome. Tabata tin algun luna atras caba. A wak si cu cierto accionnan a tuma luga pa mehora e siguridad riba nos isla. Accionnan di ilegalidad cu a wordo ataca. Hendenan cu voluntariamente a laga Aruba despues cu a bin cu sistemanan di registracion. Tambe cuerpo policial cu a haci algun trabao tremendo pa soluciona algun crimen cu toch a manera pega den nos celebro, specialmente e asesinato di un comerciante den su cas, cu ta un crimen cu te ainda tur e detayenan no ta cla. E tipo di criminalidadnan aki ta crimennan cu tin biaha ta pasa y ta haci un impacto hopi fuerte riba e manera cu nos ta wak Aruba. Naturalmente pa nos pais, nos tin custumber di biba trankil, na paz. Aruba ta conoci pa ta un di e paisnan den nos region y nos mester haci un esfuerso combina hunto cu husticia y segun van Trigt, departamentonan cu ta combati criminalidad ta haciendo un trabao pa trata di defende Aruba na varios frontera. Ta wak esey ta tumando luga den e ultimo lunanan. Ta wak cu autonan ta wordo revisa y cu droga ta wordo haya, arma ta wordo haya. ATIA ta satisfecho cu e accionnan y intentonan ta wordo haci pa frena criminalidad mas hopi positivo.
Unico cos ta cu e ta responsabilidad di cada un persona. No por pensa cu nos por laga nos cosnan habri, nos no por pensa cu nos no por cana manera nos kier cu placa, actua na un manera responsabel y esey ta un cos cu ta bay tuma henter un corporacion nacional pa por purba di frena esaki, segun van Trigt.