ATIA a organiza un sesion di duna informacion riba e tema di prohibicion di plastic na Aruba, cual ley lo drenta na vigor entrante 1 di Januari 2019. ATIA a pidi esaki na ministerio di Minister Otmar Oduber pa trece e informacion corecto na e miembronan di ATIA. Esaki pasobra tin hopi miembro cu importa plastic, ta usa plastic den nan negoshi diariamente, pues e ta hopi importante pa nan haya informacion riba con e ley aki lo drenta na vigor, kico ta e “time line” tambe pasobra ATIA ta compronde cu tin un periodo caminda nan tin ahustacion pa un aña y cual ta e productonan cu ta cay bao di e ley aki.
ATIA sigur sigur ta sostene e iniciativa aki di Gobierno pa cu medio ambiente y ta di opinion cu a bira tempo cu mester cuminsa cuida pais Aruba y dado momento ta spera cu tur cuidadano lo haci esaki di nan mes pero tin biaha Gobierno mester bin cu un ley pa stimula cierto cambio di habito serca e personanan. E organizacion ta kere fielmente cu e ta un cambio positivo pa Aruba. A wak caba e efecto cu e prohibicion di tasnan di plastic a haci riba nos medio ambiente, pues sigur sigur esaki lo bai trece un cambio positivo atrobe pa Aruba. ATIA ta di opinion cu sigur sigur e mentalidad mester cambia paso nos pilar economico ta turismo y nan tambe ta wak nos medio ambiente, con e cayanan ta mustra, con limpi nos pais ta y ademas nan ta kere cu mas y mas e mundo ta bayendo den un direccion cu tur hende ta bira mas consciente y esaki ta algo cu Aruba por bende tambe cu e turistanan. Mas y mas turistanan ta interesa den distinacionnan cu ta ofrece Eco Turismo y esaki ta cambionan positivo den e sentido ey tambe.
Pa loke ta e comerciantenan miembro di ATIA, poco ta wak e cambio den mentalidad, comerciantenan ta birando mas y mas consciente, mientras cu algun di nan mes a cuminsa haci e cambionan aki. ATIA ta kere cu te awo nan a haya solamente comentarionan positivo. Claro cu si mester tin un periodo di preparacion pa nan paso esey ta hopi importante. ATIA a papia cu minister pa dune di conoce cu e tin suport di e organisacion y lo bai haci tur lo posibel pa trece mas informacion na su miembronan pasobra e parti di conscientisacion ta hopi importante y ta willing pa duna su aporte na e ley aki.