Diabierna ultimo ATIA a organisa su di shete Annual Corporate Event den cual semper ATIA sa di trece topiconan interesante y al caso. E aña aki ATIA a scoge pa trece dilanti un topico cu tin hopi pregunta riba dje: e reapertura di e refineria.
Despues cu gobierno a firma e acuerdo cu CITGO y a lanta Refineria di Aruba na October di e aña aki, a keda relativamente keto relata na e refineria. Un pregunta cu ta biba sigur cerca mayoria di comerciante y pueblo en general ta, ki dia e refineria lo ta operacional.
Pa contesta e pregunta aki entre otro, ATIA a invita e director di Refineria di Aruba, Sr. Alvin Koolman y e Project Director di CITGO Aruba N.V., Sr. Alirio Zambrano como oradornan principal pa e anochi aki.
Dilanti un sala yena cu invitadonan manera Gobernador Interino di Aruba, Vice-Presidente di Parlamento, Minister di Economia, Minister di Turismo, y miembronan di e comunidad di comercio y industria di Aruba, Sr. Ronnie van Trigt, como presidente di e hunta directiva di ATIA, a habri e anochi cu e mensahe pa comercio pa crea un vision di confiansa, y e vision di confiansa aki lo traduci su mes den oportunidad y maneranan nobo pa eleva e sistema di haci negoshi na Aruba, asina beneficiando nos pueblo y nos economia.
Sigientemente, Minister di Economia, Sr. Richard Arends a duna su prome discurso oficial como minister, kende a trece un mensahe di positivismo pa aña 2017, den cual el a subraya e inversionnan cu ta pasando riba nos isla, entre otro e Watty Vos Boulevard, Green Corridor, e waf di Barcadera, pero tambe e pronto reapertura di e refineria y con e proyectonan aki ta catalisa actividadnan economico.
Sr. Alvin Koolman, director di Refineria di Aruba a splica cu e tarea di e compania aki ta pa supervisa CITGO Aruba N.V. y controla si e refineria ta mantene su mes na regla y acuerdonan formula den nan contrato. Ademas el a splica cu e tipo di refineria manera lo habri awor na Aruba, cual lo ta un “upgrader”, ta un di esunnan mas avansa y necesario den e procesamento di crudo. E crudo lo ricibi un upgrade na CITGO Aruba pa despues e pasa pa otro refinerianan caminda lo produci e producto final pa benta.
Den e mundo actual di petroleo un upgrader tin mas balor y longetividad cu un refineria mes.
Sr. Alirio Zambrano, Project Director di CITGO Aruba N.V. a pone enfasis riba e balornan cu CITGO ta carga pa tur su companianan. E balornan aki ta inclui siguridad, eficiencia, confiabilidad y responsabilidad social.
Tambe den su discurso Sr. Zambrano a demostra dicon e ‘business model’ aki lo ta esun perfecto pa Aruba, caminda Aruba lo hunga un rol fundamental entre Venezuela y resto di mundo.
E parti di discurso a wordo finalisa door di e directora nobo di ATIA, Sra. Michelle de Groot, kende a enfatisa e rol di ATIA como voz di comercio y e plannan di ATIA pa e aña venidero.
E anochi a conclui cu oportunidad pa network y socialisa acompaña pa musica di Tsunami. E evento aki, completamente sold out, ta mustra un biaha mas di tin un interes inmenso bou di e comunidad di comercio e industria di Aruba. ATIA ta gradici e sponsornan, CMB, Refineria di Aruba, CITGO Aruba N.V. y Pepia Est. pa nan aporte na e magno evento aki.