ATIA ta keda tuma nota cu tin inconsistencia den suministracion di barco di carga pa
Aruba. Den combersacion cu Gerencia di Astec por conclui cu un parti importante di esaki ta wordo causa pa motibo cu desde aña pasa,barco di container frecuentemente ta yegando laat pa nan berthing reservation den e schedule na waf, cu consecuencia cu e barco di containernan aki mes ta dicidi di bay otro destinacion prome cu bolbe back Aruba despues. ATIA hunto cu ASTEC y otro participantenan den e proceso lo trata na sinta na mesa pa mira con e proceso esencial pa comercio y nos economia lo por ser mitiga.
Tambe ta ricibiendo informacion cu e huma di WEB ta causa molester pa e trahadonan ariba waf, cual ta causa cu frecuentemente tin cu tarda e proceso na barco ainda mas. ATIA ta compronde cu e huma ta un molester serio pero na final di dia esaki ta afecta servicio den un proceso esencial pa comercio y Aruba.
ATIA ta keda trece e preocupacionnan dilanti pasobra Aruba su economia ta casi totalmente dependiente di un suministro di producto na un manera continuo y confiabel, mirando cu casi tur producto cu ta wordo consumi na Aruba ta wordo importa. Si e proceso aki wordo interumpi of tin tardanza pa cualkier motibo e ta causa peliger pa nos economia, muy en particular considerando e importancia di nos sector turistico.
ATIA ta sigui den contacto cu tur partido envolvi den e proceso crucial aki y ta spera di por contribui y conscientisa tur esunnan envolvi con crucial e proceso aki ta pa Aruba.