Den cuadro di eleccion 2017 ATIA lo bay tene algun anochinan di informacion entre e comerciantenan y e partido politiconan cu ta bay eleccion 2017 pa por haya sa kico ta e pensamento di e comerciante segun Sra. Michelle de Groot directora di ATIA.
E representantenan tambe lo tin un push, pa nan wak loke ta biba mei mei di e comerciantenan y hinca esaki den nan plannan di gobernacion pa e 4 añanan binidero. E plan ta pa reuni cu tur e partidonan politico.
Motibo tras di e anochinan di e informacion aki, ta pa duna e comerciante e oportunidad di directamente, trece nan preocupacionnan, haci nan preguntanan. Esaki lo crea un conexion mas cerca pa e representante, pe wak kico ta pasando, kico ta loke e pueblo kier y ta verwacht di nan.
Segun Sra. de Groot, un di e puntonan cu sigur lo bin dilanti, ta e sistema di belasting. Simplifica esaki, ya cu aworaki e ta hopi complica y ATIA lo sigui pusha pa esaki. Den e proximo simannan, lo cuminsa cu e preparacionnan di e anochinan aki di informacion.
E parti caminda e representante ta scucha kico ta e preocupacionnan, kico ta importante pa e comerciantenan. Esey lo ta e miho manera pa pone e plan di gobernacion den otro. Un di e representante ya caba a acerca ATIA y a informa nan di kico ta nan plan di gobernacion y esaki ta positivo, segun Sra. de Groot.
Hopi biaha gobierno ta bin cu ley – y decisionnan riba tereno economico, pero hopi biaha nan no ta tene cuenta cu e comerciante, cu ta esun cu lo mester carga e carga financiero. Kisas lo mester crea un balanse entre gobierno y comerciante, prome cu tuma un decision.
Loke ATIA kier sa di e representantenan politico, ta kico ta nan plannan pa loke ta e sistema di belasting, caminda lo kier yega na un sistema di belasting mas transparente.