ATIA conhuntamente cu SVb a trese un sesion di informacion tocante e maneho di boet cu lo drenta na vigor dia prome di juli di e aña aki. Un gran cantidad di miembro di ATIA a atende e sesion aki y na final a expresa nan aprecio pa e sesion informativo riba un topico cu ta toca tur doño di trabouw.
E maneho di boet aki ta wordo introduci pa sigura cu tur dunador di trabou ta cumpli cu nan obligacion pa cu e prima di SVb. Ta importante pa e companianan cu si ta cumpli pa sa cu menos compania lo tuma e riesgo di incumplimento awor cu lo tin consequencia financiero mara na incumplimento. Esaki lo contribui na un level playing field caminda tur compania eventualmente lo competi na un manera mas husto y no di manera cu companianan cu no ta cumpli tin un ventaha inhusto riba companianan cu si ta cumpli cu ley.
E boet administrativo lo por wordo impone na momento cu ta constata cu un infraccion a wordo cometi pa e doño di trabouw, por ehempel no inscribi un trahador, no inscribi un trahador na tempo, of duna informacion incorecto na momento di inscribi un trahador. E suma di boet lo wordo ahusta segun e gravedad di e infraccion, e grado di culpabilidad y circunstancianan di e caso.
SVb ta conduciendo investigacionnan regularmente caba pa sigura cu companianan ta cumpli cu nan obligacionnan.
Ademas di e maneho di boet, SVb a duna un presentacion riba plan di digitalisacion di SVb. Algun servicio ya ta obtenibel den forma digital. Esakinan ta inclui e formulario di AO, peticion pa pago di ‘ziekengeld’, e declaracion di comportacion di pago, y e declaracion di inscripcion pa DIMAS.
Ademas ta trahando riba digitalisacion di algun servicio adicional manera registracion di empleado nobo y cambionan den trahadornan. ATIA sigur ta sumamente contento cu e pronto digitalisacion di e formulario pa registra trahador nobo. Esaki ta un di e peticionan cu ATIA a hasi na SVb den un reunion algun luna pasa, pues esaki lo hasi e proceso mucho mas fasil y rapido.
Un carta di SVb lo ta saliendo den e dianan aki pa tur doño di trabou pa asina verifica cierto informacion, incluyendo un email valido di e compania, pa asina por finalisa e ultimo fasenan di digitalisacion di e servicionan aki.