ATIA ta kere firmemente den reuni regularmente cu mandatario y instancianan importante pa asina mantene un relacion estrecho cu ta facilita dialogo na momento cu mester intermedia na fabor di comerciantenan cu ta miembro di ATIA.
Den e cuadro aki, diamars merdia ATIA a ricibi bishita di Minister Dowers pa un update di tur esfuersonan cu tin pa combati y preveni criminalidad riba nos isla. Actualmente Ministerio di Husticia ta trahando riba un plan di maneho pa 2017 cu lo wordo presenta pronto. Den esaki no solamente lo enfoca riba e parti di combati criminalidad pero tambe riba e parti preventivo caminda e aspecto di nos hobennan lo wordo inclui den e plan.
Un di e problemanan enfrentando nos comunidad na e momento aki ta e caso di ilegalidad. Den medionan di comunicacion por lesa riba varios caso caminda Polis y Warda Nos Costa ta controla negoshinan y ta bin haya ilegalnan trahando na e establecimento. Loke e comerciantenan aki mester realisa ta cu dunando ilegalnan trabou, esaki no solamente ta stimula hendenan procedente di otro paisnan pa drenta nos pais, probablemente na un manera legal, y dicidi di establece nan mes ilegalmente na Aruba, pero tambe ta trese costonan innecesario pa gobierno. Na momento cu un persona cu ta habitando e isla ilegalmente bira malo of muri, e gastonan ta cay riba Aruba. Ora di deporta e personanan aki, tambe e gastonan ta cay riba Aruba.
ATIA como representante di e mayoria di comerciante aki na Aruba ta urgi e comerciantenan pa no participa den e practicanan aki, cu riba su mes tambe ta un crimen. Mester pone enfasis tambe riba e caso den cual si un negoshi ta haci uso di un contratista y e contratista aki ta haci uso di e labor di personanan cu ta ilegalmente na Aruba, no solamente e contratista ta responsabel pero tambe e negoshi cu a contrata e contratista aki. Como comerciante mester asumi e responsabilidad y sa ken ta trahando pa e negoshi en realidad. Ministerio di Husticia ta trahando riba maneranan pa atende cu e problema aki di un manera mas efectivo.
ATIA ta spera cu pa 2017 gobierno lo pone mas fondonan disponibel pa siguridad pa asina tin mas inversion den e area aki. ATIA semper ta dispuesto pa scucha y comparti informacion y alabes bin cu sugerencianan alternativo pa combati y preveni criminalidad.