Dia 8 di November Aruba Airport a facilita un asina yama Full Scale Emergency Exercise (FSEE) (simulacro) na Aeropuerto Internacional Reina Beatrix.
E simulacro a wordo organisa door di Oficina di Maneho di Crisis (Bureau Rampenbestrijding) en cooperacion estrecho cu Aruba Airport Authority, Cuerpo di Bombero, Cuerpo di Polis, Imsan Departamento di Salubridad Publico, Departamento di Asuntonan Social, Marina Hulandes y aerolinea Southwest.
Aruba Airport ta rekeri pa tene un simulacro di tal indole cada 2 aña pa asina cumpli cu standard di ICAO, y pa asina keda cumpli cu e terminonan di e Certificacion di Operacion di Aeropuerto.
E simulacro tabata consisti di un situacion di emergencia completo (full emergency), un aterisahe unda e avion a accidenta y e prome reaccion door di tur instancia concerni, incluyendo e implementacion di e Plan di e Aerolinea di Asistencia pa Famia den coordinacion cu Departamento di Asuntonan Social y Cruz Cora.
E simulacro a wordo planea y ehecuta durante oranan di madruga pa asina evita cualkier inconveniencia pa cu operacion di airport y aerolineanan. CEO di Aruba Airport, Sr James Fazio a expresa su gratitud na tur esnan involvi den e preparacionnan y ehecuccion di e simulacro di e aña aki y a felicita e Oficina di Maneho di Crisis cu un excelente trabou.
Durante e simannan venidero tur esnan involvi den e simulacro di e aña aki lo evalua e procedura y protocolnan di e simulacro, y unda ta necesario, incorpora e recomendacionnan den nan plannan respectivo di reaccion.