STRASBOURG, Francia- Al menos cuater persona a muri y 12 otro a resulta herida pa un tiramento cu a tuma luga den e centro di Strasbourg (Francia), segun informe di autoridadnan di e pais aki. Shete di e heridonan ta den estado critico.
E tironan a tuma luga cerca di un di e mercadonan di Pasco den e ciudad. Segun informenan un persona desconoci a cuminsa tira den e Rue des Grandes-Arcades, cu ta keda cera di e feria di Pasco. Esaki a tuma luga rond di 8 or di anochi. E sospechoso a huy for di e sitio.
Riba rednan social imagennan a cuminsa core rond di loke a tuma luga, den algun di cual supuestamente lo por a wak personanan herida riba caya, mientras cu otronan ta mustra hendenan ta core door di e panico na momento di scucha e tironan.
Ministerio di Interior Frances a confirma cu diamars un “incidente grave di siguridad” a tuma luga na Straatsburg, mientras cu autoridadnan a haci un yamado na ciudadanonan pa keda paden di nan cas.
Despues di e tiramento, e Isla Grandi, unda e centro historico di e ciudad ta ubica, a wordo acordona. Tur bar y restaurant ubica den e area a cera nan portanan cu bishitantenan paden y a urgi e turistanan pa keda paden.
Mientras tanto, den hospitalnan di e ciudad, un protocol di emergencia a wordo activa. Esaki ta wordo activa na momento di atakenan terorista of catastrofenan.
Dor di e tiramento, e president Frances Emmanuel Macron a cancela un importante recepcion den Palacio di Elisee y a manda e minister di Interior pa Straatsburg.
Diaranson, Francia a decreta un dia di luto den e ciudad pa honra e victimanan di e tiramento, segun e alcalde di Straatsburg a anuncia.
E atacante.
Informennan di prensa ta indica cu e sospechoso a wordo herida pa autoridadnan prome cu el a huy di e luga. Despues di esey el a cera su mes den un caya den e bicindario y e ta rondona pa e forsanan di siguridad.
Segun e gobernador di e departamento di departamento di Bas- Rhin, e presunto autor di e tiramento a wordo identifica como Cherif C., naci na 1989, na Strasbourg, Le Figaroa a informa.
Segun fuentenan policial, e sospechoso tabata conoci pa polis pa su actividadnan delictivo. E mester a wordo aresta na su cas diamars mainta, pa homicidio. Pero el a scapa di polisnan y na su cas a bin haya varios granada.
Ademas, informenan ta indica cu e atacante tin e ficha S policial, cu na Francia ta indica cu e persona ta wordo investiga pa servicionan di siguridad y ta forma un riesgo pa siguridad di Estado.
E analista internacional Amin Lejarza a sostene cu “siguridad 100% no ta existi”y cu cualkier persona por sali ariba caya cu’n cuchiu y ataca hende. “Esey no kiermen cu e ta un atentado yihadista ni nada”. Ta imposibel pa “cubri cualkier suceso di e tipo aki”, ni maske con reforsa e siguridad ta, pero si e ta necesario “pa tin un siguridad mas grandi posibel den cada mercado di Psco y den cada acto publico”.