BARCELONA, Spaña- Un van a atropeya un multitud di hende ariba e paseo turistico Las Ramblas de Barcelona, lagando por lo menos diestres persona morto y como 50 otro herida den un hecho califica como un “atake terorista” pa polis di e di dos ciudad mas grandi di Spaña.
E incidente a tuma luga den oranan di atardi riba un boulevard hopi concuri.
“Un van a caba di atropeya un multitud riba las Ramblas de Barcelona”, segun e Mossos d’ Esquadra (polis regional di Cataluña) a indica na principio.
Polisnan a logra detene un di e sospechosonan, Dris Oukabir, di Marsella y cu residencia na Spaña. Medionan di prensa a informa cu e sospechoso tabata biba den sur di Francia y a traslada su mes pa un pueblo di Cataluña cerca di e frontera.
E zona di incidente a wordo cordona pa motibonan di siguridad y cinco ambulans y mas di binti auto di polis tabata den e luga, segun un periodista a constata na AFP.
Algun herido a wordo hiba pa e tienda Corte Ingles, aparentemente pa practica prome auxilionan, segun e periodista di AFP. E polisnan a pidi e comercio cerca di e luga di incidente pa laga e peatonnan drenta y cera e portanan.
Otro agente a desaloja e Plasa Cataluña cu ta keda cerca, mientras nan tabata bisa via portofoon: “atake terorista”. Autoridadnan a duna ordo pa cera e station di metro den e zona.
Segun testigonan, e sucedido tabata intencional, ya cu e chauffeur tabata coriendo duro, purbando di dal mas hopi hende posibel.
Spaña, e di tres destino turistico mundial, te cu aworaki tabata keda na margen di e olanan di atentado di Estado Islamico den ciudadnan grandi Europeo manera Paris, Bruselas, London, Nice of Berlin.
Pero na 11 di Maart 2004 el a sufri e atentadonan yihadista mas mortifero cometi na Europa, ora cu un docena di bom a rementa den varios trein di Madrid, causando casi 200 morto. E atake a wordo reindivica na nomber di Al Quaida.
Fuente: http://www.dailymail.co.uk/