TEHERAN, Iran – Un persona a rementa su mes den e mausoleo di Ayatola Jomeini, situa zuid di Teheran. Television estatal Irani a informa cu cuater “terorista”, entre nan un atacante suicida, a asalta e mausoleo. Segun medionan Irani, un di e atacantenan a wordo abati y e otro captura.
Dos atacante tabata tin fahanan cu explosivo
Segun Mohammad-Ali Ansari, funcionario di e mausoleo di Jomeini, tres persona a fayece y otro tres a resulta herida den e atake terorista. “Dos atacante tabata tin faha cu explosivo. Nan a drenta den e santuario y a cuminsa tira. Durante e tiroteo, tres guardia di siguridad a resulta y un trahado a wordo asesina,” Ansari a bisa, cita pa e portal IFPNews.
“Dilanti di e sala principal di e mausoleo, agentenan di polis a cuminsa tira contra e teroristanan, loke a provoca cu un di e atacantenan a rementa su mes. E di dos terorista a huy, pero despues el a wordo abati pa Polis,” el a añadi.
E agentenan a logra desactiva e vest suicida di e atacante abati, Ansari a afirma, agregando cu e teroristanan tambe tabata tin varios granada y explosivo cu nan.
E agencia Mehr a bisa cu e atacante suicida tabata supuestamente un muhe, kende a explota su mes den e patio occidental di e compleho funerario.
E canal Irani Press TV a publica un potret di e restonan di e atacante suicida.
Segun algun informacion, un di e atacantenan di e mausoleo, supuestamente a mata su mes tragando cianide.
Medionan local a dunai nformacionnan contradictorio riba e cantidad di victima den e atake. Segun datonan no confirma, tabata tin un morto y cuatro herido.
E mainta di diaranson, tambe a registra un tiroteo den e Parlamento Irani, cu a laga varios morto y por lo menos 33 herido.
Fuente: https://actualidad.rt.com