BERLIN, Alemania – E atake pa un mercado di pasco na Berlin dialuna, a laga 15 morto y 45 perido, segun autoridadnan Aleman a afirma den un rueda di prensa diamars.
Segun a wordo bisa den un rueda di prensa, e cantida di victima mortal a aumenta caminda cu a wordo yama un ‘acto terorista” pa e canciyer Aleman, Angela Merkel.
E fiscal a afirma cu a trata aki di un atake terorista manera esun di Niza, pero a bisa cu ainda no sa si esaki a tuma luga pa uno of varios atacante pasobra e investigacion no a conclui.
Un truck grandi a dal contra un multitud riba e mercado Breitscheidplatz dialuna, pa 8’or di anochi ora local.
Te awor aki ningun organisacion a atribui na e atake.
Un persona a keda deteni, aunke oranan despues polis a bisa cu no por confirma cu ta trata aki di e conductor di e camion.
“Ainda nos no a caba cu e investigacion. Nos no por confirma cu e persona aki (e sospechoso den custodia) ta e conductor. Nos tin hopi declaracion di testigo. E truck ta sigui wordo revisa,” e presidente di polis di Berlin, Klaus Kandt a bisa.
Dos funcionario di inteligencia Aleman a bisa CNN cu, segun e identificacion nacional, e detenido ta un refugiado procedente di Pakistan, cu a yega Passau, Alemania, despues di a biaha atrabes di e Balkannan.
Den un conferencia di prensa, e minister di interior Aleman, Thomas De Maiziere, a bisa periodistanan cu e detenido a bin “probablemente di Pakistan” y a registra pa drenta Alemania dia 31 di December 2015 y a presenta dilanti autoridadnan di Berlin na Februari di 2016. El a agrega cu e sospechoso a nenga di ta involucra cu e atake.
Un di dos homber sospechoso haya morto den e truck tabata di nacionalidad Polaco y no tabata stuur esaki ora cu e accidente a tuma luga.
De Maiziere a agrega cu e persona haya den e cabina tabata tin heridanan di bala y cu e ta forma parti di e investigacion. No a haya e arma cual a produci e heridanan.
Fuente: CNN en Español