MOGADISHU, Somalia- Un atake di un truck carga cu explosivo contra di un di e hotelnan mas popular di e capital, ta hiba e seyo di Al Shabab.
E capital di Somalia, Mogadishu, diadomingo tabata escenario di un atake terorista cu a causa morto di 300 persona, según e ultimo balans oficial. Ademas, e atake a laga cientos di herido y a provoca e derumbe di varios edificio.
Segun medionan local, mayoria di e personanan cu a fayece den e atake ta civil, bendedonan ambulante cu tabata comercialisa den un di e cayanan mas druk di e ciudad. Hopi tambe a perde nan bida ora cu e hotel unda cu e bom a explota, a cay aden. Cinco di e victimanan tabata boluntarionan di Media Luna Cora di Somalia.
Hospitalnan di e ciudad ta inunda door di e yegada masal di e heridonan, ya cu nan no tin suficiente remedi ni tampoco sanger pa realisa transfusionnan. Presidente di e pais, Mohamed Abdullahi Mohamed, a haci un yamada urgente na e poblacion pa nan duna sanger.
Un truck carga cu explosivo a rementa diadomingo cerca di e entrada di e hotel Safari, un di esunnan mas popular di e ciudad, cerca di varios oficinanan gubernamental, hotel y restaurantnan. Forsanan di siguridad a wordo avisa tocante e truck aki y nan tabata den su persecusion ora cu explosion a tuma luga.
Despues di e explosion, varios edificio a cay den otro, entrenan e hotel Safari, y varios ta e personanan cu a keda dera bou di e ruinanan.
Fuente: http://www.bbc.com/