BAMAKO, Mali- Autoridadnan local a adverti cu e cantidad di mortonan por aumenta segun ta haya mas cadaver.
E ultimo actualisacion ta conta cu 134 persona a wordo asesina diasabra den e pueblo di Ogossagou, situa den e centro di Mali, ora cu hombernan arma a rondena e luga y a cuminsa tira ariba e habitantenan, segun e alcalde di e pueblo cercano, Bankass, a confirma na Reuters.
E victimanan ta pastoornan (herder) di e pueblo nomado, Fulani, cu ta biba den un territorio amplio di Africa Occidental. E atacantenan a yega na e aldea disfrasa di casadornan tradicional rond di 4 or di marduga.
Di su banda, Abdoul Aziz Diallo, presidente di e asociación internacional Tabital Pulakuu cu ta apoya e tribu Fulani, a afirma cu entre e personanan cu a fayece ta haya muhenan na estado y muchanan chikito, mientras cu otro dirigente di un milicial local di e Fulaninan a bisa cu e lider di Ogossagou y su nietonan tambe ta morto, segun AFP.
“E pueblo di Ogassagou ta completamente destrui”, Guindo a comenta, den referencia di un di e atakenan mas mortal di e tipo di e region aki. E conteo di mortonan ta siguiendo su curo segun ta hayando mas cadaver.
Un di e residentenan local a comenta na Reuters, den forma anonimo, cu e atake parce di a wordo perpetra den respuesta na e reindivicacion diabierna di un afiliado di Al Qaeda den un atake cu a mata 23 soldaat siman pasa. E grupo aki a declara cu e atake tabata un represalia pa e violencia di militarnan di Mali contra di e Fulaninan.
Guindó a agrega cu adema di Ogossagou un otro pueblo di e Fulani, Welingara, tambe a wordo atacam pero cuanto persona a wordo mata eynan, no ta conoci.
Di su banda, AP ta señala cu e agresornan tabata combatientenan di e grupo etnico di e dogonnan. E Dogon y Fulaninan a coexisti den e parti central di Mali pa hopi tempo, pero e paz entre e dos etnianan aki a wordo kibra despues di e yegada di gruponan yihadistanan di otro partinan di e pais.
E Dogon ta acusa e Fulaninan di apoya e extremistanan vincula cu gruponan terorista, mientras cu e Fulani ta acusa e Dogonan di apoya e ehercito nacional den nan esfuerso di eradica extremismo.