CONGO, Africa – Dos soldaat Surafricano di e forsanan di paz Sur Africano a wordo ataca door di rebeldenan cu a ataca nan cerca di e zona central di e brote di ebola. E atake aki a tuma luga na e parti west di e Republica Democratico di Congo.
Nacionnan Uni a anuncia e atake cu a sosode net pafo di e ciudad di Beni y a enfatisa con atakenan aki ta obstaculisa e esfuersonan di autoridadan pa combati e di dos brote di Ebola di e aña aki, na e Republica Democratico di Congo.
Funcionarionan di salud a comenta cu nan por a progresa, pero dor cu algun di e areanan di e zona di e brote ta den un zona conflictivo unda decenas di gruponan arma ta kedando, el a bira un bataya contra di tempo pa sigura cu e brote por wordo rastrea adecuadamente. Autoridadnan por a uza tratamientonan experimental y un vacuna nobo pa para e plamamento di Ebola den e Republica Democratico di Congo, pero tambe nan a menciona cu nan no por sigura cu e situacion ta bou di control debi na e restriccionnan den algun area unda e personanan ta biba of ta bishitando.
Florence Marshal, un vocero di e mision di Nacionnan Uni conoci como MONUSCO, a comenta cu e dos soldaatnan di e Mision di Paz a wordo ataca den e ciudad di Ngadi dor di militantenan cu probablemente tabata pertenece na e Allied Democratic Forces, cual ta un grupo Islamista Ugandes activo den mita di e parti west di e Republica Democratico di Congo. E condicion di e dos soldaatnan aki ta stabil.
E brote actual di Ebola a infecta mas di 120 persona di cual 81 a perde nan bida desde Juli. Diesnuebe di e casonan ey a sosode den Beni, un ciudad cu un populacion di miles di persona cu tin relacionnan comercial cu Uganda, pero tambe ta yen di peligernan asocia cu e militarnan. E brote aki ta e di dies na Congo desde cu Ebola a wordo descubri den e parti nort di e pais na 1976, pero tambe ta e prome cu a afecta un porcion oriental densamente pobla di e nacion Africano.
Vocero di e World Health Organization, sr. Tarik Jasarevic, a comenta cu e pacificadonan di e MONUSCO tabata yudando proporciona escoltanan diario den e ciudad di Oicha, unda un caso den e brote actual di Ebola a wordo confirma. Algun parti di e caminda di 30 km entre e ciudad y Oicha ta considera un “red zone” debi na e aumento di atakenan rebelde.
Muchanan a cuminsa atende scolnan atrobe apesar di e brote andando, mientras cu funcionarionan di salud y UNICEF ta trahando cu educadonan y funcionarionan local pa yuda duna entrenamento p’e higiene adecua pa trata e virus aki. UNICEF a bisa cu tin alrededor di 250 scol den e zonanan afecta pa Ebola, pero mayoria di nan ta prepara p’e aña escolar nobo y a despacha programanan pa yuda prepara e muchanan pa yuda den prevencion di e virus pa e no sigui plama.