Tata di e vice-presidente di Colombia, Francia Marquez, a sufri un atake arma diadomingo den e zona rural di Jamundi, Valle del Cauca. Polis a informa cu Sigifredo Marquez Trujillo tabata biaha den un auto hunto cu un menor diedad ora cu nan a tira cuater biaha contra e vehiculo. Afortunadamente ambos a resulta ileso y a bay n’e substacion di Polis Robles-Jamundi. Despues, a evacua Marquez Trujillo den helicopter p’e ciudad di Cali.
E medionan local a sugeri cu e bloke Jaime Martinez di e disidencianan di FARC por tabata tras di e atake. E vice-presidente Francia Marquez a expresa su dolor p’e atentado, señalando cu su tata, su sobrino di seis aña y e dos bodyguardnan tabata riba e caminda Suarez-Cali,, na altura di Timba, na momento di e atake.
Afortunadamente tur a sali ileso.
Francia Marquez a manifesta su preocupacion p’e siguridad den e regionnan di Cauca y Valle del Cauca, incluyendo e municipio di Suarez y e coregimento di La Toma. El a pidi Ministerio Publico pa investiga e incidente y a pidi e Ministerio di Defensa Nacional pa tuma medida pa fortalece e presencia militar y policial den e region. “Den e momentonan dificil aki mi ta haci un yamada na henter Colombia pa uni n’e esfuersonan pa conduci nos sociedad na paz. Si nos traha den unidad, nos por supera e pagin aki di dolor y violencia,” e vice-presidente a afirma.
E presidente Colombiano, Gustavo Petro, tambe a reacciona n’e incidente, expresando su solidaridad cu e vice-presidente y a pidi autoridad cuminsa cu e investigacionnan corespondiente. Un video comparti riba e rednan social a mustra e famia di e politico subiendo un helicopter di Policia Nacional pa wordo traslada pa Cali. Presidencia di Colombia a condena e atake, cualificand’e como un violacion flagrante di e derechonan humano y a anuncia cu lo sigui e ofensiva militar den e zona.