ALEMANIA – Polis Aleman a detene e madruga aki e autor di e atake contra e autobus den cual e hungadornan di Borussia Dortmund tabata biaha aden dia 11 di April ultimo y cu e futbolista Spaño Marc Bartra y un polis a resulta herida.
Segun varios corant Aleman ta informa, ta trata di Sergei W., un hoben di 28 aña di nacionalidad Ruso y Aleman, cual intencion no tabata perpetra un atentado terorista, sino bira rico. Su obhetivo tabata pa e hungadonan muri pa e accionnan di Borussia Dortmund cay den e Bolsa (stockmarket) y obtene beneficionan grandi den futuro.
A detene un Iraki
Di e manera aki ta descarta cualkier atake cu conotacionnan politico, un di e liñanan di investigacion di Fiscalia Aleman despues cu polis a detene Abdul Beset, un Iraki di 26 aña kende a wordo acusa di ta miembro di Estado Islamico y di a mantene contacto cu miembronan di e grupo terorista for di Alemania, unda cu el a yega na comienso di aña pasa.
E atake a wordo reivindica hasta pa tres grupo distinto: un colectivo di extrema izquierda di Alemania, otro di extrema derecha y un grupo yihadista. E ultimo aki tabata e centro di investigacion despues cu investigadornan a haya un carta cerca di e zona caminda cu a tuma luga e tres explosionnan unda cu a adverti cu deportista y artistanan tabata obhetivo di Estado Islamico.
Fuente: El Confidencial