Segun CEO di Aruba Tourism Authority, Ronella Tjin Asjoe Croes, turismo crucero ta sigui mira mas reto. Nos tin un di e liñanan di crucero mas grandi na Aruba cu ta Carnival Cruise Lines cu a indica siman pasa cu pa prome kwartaal di 2021 nan no lo nabegando y brindando nan servicio for di diferente di nan puertonan. Pues esey ya caba ta un decision tuma, y asina bo por mira pa otronan tambe.
“E ta sigui ta un situacion cu hopi mas reto.Nos ya caba a proyecta cu nos no ta conta cu turismo crucero pa prome kwartaal di e aña aki. Pues aworaki tur mira ta riba si por re inicia esaki gradualmente den e segundo kwartaal bay dilanti,” segun sra. Tjin Asjoe-Croes.
Pa turismo crucero, e proyeccionnan di ATA y Aruba Ports Authority ta cu si Aruba por ricibi entre 25% cu 50% di loke nos a ricibi na 2019, eynan ta unda e ta wordo mira: dus e por ta un kwart di loke a ricibi na 2019 y si e ta hopi bon nos lo por yega mita di loke nos a ricibi na 2019.