Tin diferente componente cu ATA ta uza, cual hopi biaha no ta bin dilanti, pa midi cual ta e turista cu ta gasta mas. Sra. Ronella Tjin A Sjoe- Croes, CEO di ATA ta elabora ariba esaki.
Ta midi p.e algo cu ta hopi papia, ta midi e cantidad di bishitantenan cu ta bin Aruba, cu ta cay bou di cierto entrada anual. Den tur loke ATA ta haci, nan ta concentra nan mes ariba, p.e. e mercado di Merca, nan ta distingui esunnan cu ta gana 100 mil dollar pa aña bay ariba. Si nan ta esun cu nan ta asumi cu ta gasta mas, nan ta esun cu tin e medio financiero pa paga pa un vacacion na Aruba.
ATA a bin ta midi esaki for di 2014 y nan por mira ariba base anual, esaki a crece ariba e mercado Mericano. Incluso, e meta cu nan a pone pa crece e aña aki di 5%, nan ta ariba e bon caminda pa ATA. Esey pues, e ta indicador interno. Tambe ATA ta pone hopi atencion ariba lunanan, cu ta conoci como “low season”, pero mester bisa cu Aruba no conoce “low season” mas. E cantidad di turista cu ta wordo atrai den lunanan di Mei, Juni, September, October ta nivelando y a sa di nivela e añanan anterior y e aña aki ta sigui mira e mesun tendencia.
Segun Sra. Tjin A Sjoe, esaki ta e strategia dirigi ariba esey tambe. Ta mira cu for di 2012 unda cu ATA a pone hopi atencion y a haci cambionan structural ariba e manera cu nan ta promove Aruba, ta wak cu no ta captura negoshi durante high season so, pero tambe a bin ta captura ariba base continuo ariba un base eleva, den e lunanan ya menciona, cu ta pone e cantidad di bishitante ta genera mas ingreso dilanti di lunana asina aki.
Por ultimo, un otro punto pa remarca ta cu ATA ta midi e averahe cu un bishitante ta gasta pa dia, pa persona. Esaki ta haci a base di informacion cu nan tin di Banco Central mes. E prome dos kwartaal di e aña aki, por mira cu e prome kwartaal a mustra un crecemento di 12% compara cu 2016 y e di dos cu 4 pa 5%. Ta cosnan cu toch, patras di tur e indicadornan nacional, tin hopi aspecto cu ta wordo midi door di ATA pa cual tin hopi strategianan dirigi pa pusha esakinan.
Sra. Ronella Tjin A Sjoe- Croes, CEO di ATA a gradici e ekipo di ATA, un aña relativamente exitoso un biaha mas. Mas cu claro, tur aña tin nan retonan y nan oportunidadnan. Pero sigur como ekipo, nan a sa di uni forsa, e ekipo local y internacional. Sra. Tjin A Sjoe ta contento di wak e resultadonan, y esaki no ta posibel sin e sosten di nan socionan. Gobierno ta hopi clave pa loke ta e operacion di ATA pero tambe e sector priva y e sector turistico. Tin hopi otro socio cu no ta directamente dirigi ariba e sector turistico, ta clave pa loke ta trata exito di Aruba. Esaki ta sigui ta cardinal pa e añanan cu ta sigui. Pa e motibo aki ta importante pa tur hende ta alinea y e agenda di turismo ta presente den diferente instancianan y plataformanan, pa asina crea un producto turistico mas fuerte ainda.
Na e comunidad, medionan di prensa, Sra. Tjin A Sjoe ta desea un Prospero Aña 2018, yena cu salud.